د سلمان خان پر څرګندونو خواله رسنیو کې سخت غبرګون

هغوی چي جګړه غواړي باید د جګړۍ لومړۍ لیکې ته واستول شي د انځور حقوق Getty Images
Image caption هغوی چي جګړه غواړي باید د جګړۍ لومړۍ لیکې ته واستول شي

د بالیووډ لوبغاړي سلمان خان په وروستیو کې جګړې ضد څرګندونې کړي چې له امله یې اختلافونه را ټوکېدلي او یو شمېر کسانو پرې نیوکې کړې دي.

نوموړي د خپل نوي فیلم (ټیوب لایټ) د پېژندنګلوۍ په مراسمو کې د جګړې پر پلویانو نیوکې وکړې او ویې ویل:

"هغوی چي جګړه غواړي باید د جګړۍ لومړۍ لیکې ته واستول شي، چې پوه شي د جګړې زیانونه څه دي. "

د نوموړي پر دغو څرګندونو د ټلوېزیونونو په ګردو مېزو کې بحثونه پیل شول او نوموتو لیکوالانو یې پر څرګندونو شننې پیل کړې.

د سلمان خان نوی فیلم (ټیوب لایټ) په ۱۹۶۲ کال کې له چین سره د شوې جګړې پر بنسټ جوړ شوی دی.

خو کله چې په دې اړه له سلمان خانه پوښتنه وشوه ویې ویل، فیلم د جګړې په اړه نه، بلکې انسانانو ته د جګړې پر زیانونو جوړ شوی دی: "په فیلم کې پر دې ټینګار شوی چې جګړه ژر پای ومومي او ځوانان مو کورونو ته ستانه. "

نوموړي د خپلو خبرو په بهیر کې د جګړې پر امر کوونکو لفظي ګوزارونه وکړل او ویې ویل: "زما په فکر هغوی چې د جګړې امر ور کوي، باید د جګړې لومړۍ کرښې ته بوتلل شي، ټوپک ور کړل شي چې لومړی ته پرې ورځه ـ نو په یوه ورځ کې به کراره کراري شي‎.

د فیلم لارښود کبیرخان دی.

له سلمان خان سربېره پکې سهیل خان هم د پوځي رول لوبولی او د فیلم مرکزي ښځینه رول چنیايۍ فیلمي لوبغاړې (زو زو) لوبولی.

کله چې د اختلافونو په تړاو له سهیل خانه وپوښتل شول، ویې ویل:

''جګړه پخپله منفي جذبه ده چې هیڅوک یې نه خوښوي. د هرې مسلې وروستی حل په خبرو کې دی، خو بیا هم د خلکو تر منځ جګړې روانې دي. ''

د سلمان خان په یادو خبرو د هندوستان په ټلوېزیونو کې تاوده بحثونه روان دي. ځینې خو د نوموړي پر څرګندونو د غور پر ځای هغو ته له پاکستان سره تړاو ور کوي.

د انځور حقوق @BEINGSALMANKHAN
Image caption سلمان خان وايي جګړه کې دواړه لوري ته خلک وژل کېږي

یو شمېر کسانو لیکلي، له پاکستان سره چې هر ځل خبرې اترې شوي، مثبته پایله یې نه ده لرلې.

خو یو شمېر نورو بیا لیکلي، سلمان خان د سولې خبرې کړي، که ډېرې ونه شاربل شي، ښه به وي.

خو یو شمېر نورو بیا له بلې زاویې دې مسلې ته کتلي او هغه یې د فیلم په مشهورولو کې د سلمان نوی چلند ګڼلی دی.

اړونده مطالب

ورته مطالب