عامرخان: کتاب مې له مړینې وروسته خپور کړئ

د انځور حقوق SPICE PR
Image caption سیکریټ سوپر سټار کې د دنګل ممثله هم لیدل کېږي

د ښځو ځواکمنتیا پر موضوع له 'دنګل ' فلم جوړولو وروسته اوس وتلي هندی فلمي لوبغاړي او لارښود عامر خان په یوې ورته موضوع د 'سکریټ سوپر سټار ' په نامه نوی فلم چمتو کړی دی.

د عامر خان ډېر فلمونه خورا بریالي وو. نوموړي له بي بي سي سره خبرو کې ویلي، که فلم په زړه پورې نه وي، یوازې د مشهورو فلمي ستوو شتون یې د بریا تضمین دی:

''د فلم ناکامي یا کامیابي د مشهورو فلمي ستورو له کبله نه وي، 'پي کي ' غوندې فلم زما له کبله نه دی کامیاب شوی، بلکې هغه ډېر ښه فلم و، ځکه خلکو هم خوښ کړ. فلمونه د مشهورو ممثلینو له کبله نه کامیابېږي، بلکې د غوره فلمونو له کبله ممثلین شهرت او کامیابي مومي. ''

د انځور حقوق SPICE PR

د عامر خان مور غوښتل نوموړی کاروبار او سوداګرۍ ته توجه وکړي، ځکه دغه برخه کې د ناکامۍ احتمال لږ وي او له همدې کبله یې هغه ته خبرداری ورکړی و، چې فلمي ممثلین ایله اووه یا اته کاله د کامیابۍ اوج ساتلی شي.

عامر وايي د داسې یوه فلم په کیسې پسې ګرځي چې د شاه رخ خان او سلمان خان په ملګرتیا په کې تمثیل وکړي.

چین کې د عامرخان دنګل فېلم نندارې ته وړاندې کېږي

له عامر سره مینه خو له هنره یې کرکه

د عامر خان نوم د ۱۰۰ اغیز درلودونکو په نوملړ کې

عامر خان د تمثیل تر څنګ ډېر مدني فعالیتونه هم کوي، خو وايي پرېکړه یې کړې چې هېڅکله به سیاست ته داخل نه شي، ځکه په وینا یې لا هم ډېر نور کارونه شته، چې د ټولنې لپاره یې باید وکړي.

عامر خان غواړي ژوند لیک هم ولیکي، خو وايي شرط په کې دا دی، چې وکیل سره به خبرې وکړي، چې په کتابي بڼه باید د ده له مړینې وروسته خپور شي:

''زه غواړم هغه مهال دا کتاب خپور شي، چې زه دې نړۍ کې نه یم. ''

د انځور حقوق SPICE PR
Image caption سیکریټ سوپر سټار کې عامر خان د موسیقۍ استاد په بڼه لیدل کېږي

عامر خان فکر کوي، خلکو ته یې د ژوند په هکله هر څه معلوم دي او ژوند لیک به یې د نورو لپاره ډېر په زړه پورې نه وي او ځکه غواړي چې دغه کتاب ۵۰ یا ۱۰۰ کاله وروسته خپور شي.

عامر خان وايي، ۳۰ کاله یې فلمي نړۍ کې تېر کړي، ډېر څه یې موندلي او څه نا څه یې بایللي هم دي، لکه دا چې وايي د کار پر مهال کورنۍ ته لومړیتوب نه ورکوي او خپل دغه خوی یې ځوروي هم.

د انځور حقوق SPICE PR

نوموړی وايي، یو زوی او یوه لور لري، چې له زړه یې نه وځي.

'سیکریټ سوپر سټار ' کې به نوموړی د موسیقۍ استاد په بڼه څرګند شي. دغه فلم به د اکتوبر پر ۱۹ نندارې ته وړاندې کېږي.