"د طالبانو مشرتابه شورا ښايي افغانستان ته لېږدېدلې وي"

د انځور حقوق Getty Images

نيويارک ټايمز ورځپاڼې په خپله نننۍ گڼه کې د اسوشېټډ پرېس خبري اژانس هغه خبر راخستی چې د طالبانو د وياند هغې ادعا ته پکې کتنه شوې چې وایي؛ د طالبانو مشرتابه له پاکستانه افغانستان ته لېږدېدلې.

ورځپاڼه وايي؛ که دا خبره کره شي نو دا د افغانستان دولت پروړاندې جگړه کې د طالبانو پر ځان باور څرگندوي.

د ورځپاڼې په وينا که دا رښتيا وي نو له پاکستانه د ځان لرې کولو په برخه کې د طالبانو يوه هڅه هم بلل کېداى شي، ځکه پر طالبانو تور پورې کېږي چې پاکستان يې ملاتړ کوي.

ورځپاڼې د طالبانو د وياند ذبيح الله مجاهد وينا را اخيستې چې اسوشېټډ پرېس ته یې ویلي؛ د دوى د مشرتابه شورا څو مياشتې وړاندې افغانستان ته لېږدېدلې ده، خو د ځاى ځايگي په تړاو يې څه نه دي ويل شوي.

د طالبانو يوۀ بل چارواکي ويلي شورا د افغانستان هلمند ولايت ته لېږدېدلې. د طالبانو بله سرچينه بيا وايي؛ د عدلیې، جلب او جذب او مذهبي چارو شوراگانې د افغانستان سويل ته لېږدول شوي دي.

خو د افغانستان حکومت وياند هارون چخانسوري ویلي؛ "داسې هېڅ استخباراتي شواهد نشته، او زموږ په باور د طالبانو مشران اوس هم له هېواده بهر دي."

اکسپرېس ټريبيون:

د انځور حقوق Getty Images

د پاکستان چاپ اکسپرېس ټريبيون ورځپاڼه وايي؛ کابل او اسلام اباد بیا په لوړه کچه سره اړيکې نيولي او ورسره د دوه اړخيزو اړيکو د عادي کېدو هيلې راټوکېدلي دي.

ورځپاڼې د افغانستان د ولسمشر محمد اشرف غني او د پاکستان لومړي وزير نواز شريف پرونۍ کتنې ته اشاره کړې چې د ترکمنستان په عشق آباد کې د ترانسپورټ په تړاو شوې يوې نړېوالې غونډې په څنډه کې وشوه.

ورځپاڼه وايي؛ بل لوري ته د پاکستان د پوځ تلونکي مشر جنرال راحيل شريف هم د افغانستان اجراييه رييس عبدالله عبدالله سره پر ټيليفون خبرې کړي دي.

ورځپاڼه زياتوي؛ د افغانستان او پاکستان حکومتي مشرانو مشرانو په داسې حال کې سره اړيکي ټينگې کړي چې اسلام اباد د سولې بهير ته د طالبانو هڅولو په برخه کې خپلې هلې ځلې گړندۍ کړي.

ورځپاڼه زياتوي؛ په قطر کې د طالبانو دفتر د احتمالي سياسي خبرو اترو لپاره پر يوې ستراتيژۍ غور کوي.

گارډين:

د انځور حقوق Getty Images

د بريتانيا چاپ گارډين ورځپاڼې؛ د امريکا په ويسکانسن ايالت کې د تېرو ولسمشريزو ټاکنو د رايو بيا شمېرنې ته کتنه کړې او وايي؛ د هيلري کلنټن ټاکڼيز کمپاین هغو کسانو ته د مرستې ټټر وهلى چې غواړي د ځينو نورو ايالتونو رايې هم بيا له سره وشمېرل شي.

د آغلې کلنټن د ټاکنيز کمپاین چارواکو ويلي، آن که سپينه ماڼۍ له دغه بهير سره مخالفت وکړي دوى به د رايو بيا شمېرنې بهير ملاتړ کوي.

د امريکا نوي ټاکل شوي ولسمشر ډونلډ ټرمپ دغو هلو ځلو ته په غبرگون کې ويلي؛ ټاکنې ختمې شوې او د پایلو د ننګولو پرځای دې ورته درناوی وشي.

ټرمپ زياته کړې چې بايد د راتلونکې په لور گام واخيستل شي.