نیویارک ټایمز:د بلخ تر خونړي برید وروسته د تابوتونو کمی

نيويارک ټايمز:

د انځور حقوق AFP

نيويارک ټايمز د بلخ ولايتي شورا د يوۀ غړي په وينا ليکلي چې پر شاهين قول اردو د طالبانو له بريد وروسته په هماغه سيمه کې ان د تابوتونو کمى رامنځته شوى و.

ورځپاڼه وايي، سرتېري هغه مهال په نښه شوي چې وسلې ورسره نه وې، د جمعې له لمانځه ترسره کولو وروسته له جوماته په وتلو و او غرمنۍ لپاره ورتله.

ورځپاڼه وايي، دا په تېرو ١٦ کلونو کې د افغانستان پر پوځ تر ټولو دروند گوزار دى.

ځينو چارواکو اندېښنه ښوولې چې ښايي له بريدگرو سره له دننه مرسته شوې وې.

واشنگټن پوست:

د انځور حقوق AFP

واشنگټن پوست ورځپاڼې هم په همدې تړاو په يوۀ مطلب کې ليکلي چې د بريد پر مهال په دغه اډه کې ناټو پورې اړوند يوه ډله جرمن پوځي روزونکي هم و، خو هغوى ته د زيان اوښتو په تړاو کوم رپوټ نه دى ترلاسه شوى.

ورځپاڼې افغانستان کې د امريکايي ځواکونو د قومندان جنرال جان نيکولسن څرگندونې راخيستي، نوموړي افغان کوماندو ځواکونه ستايلي چې په وينا دغه خونړي بريد ته يې د پاى ټکى کېښود.

شپيگل:

د انځور حقوق AFP

جرمنۍ مجلې شپيگل په خپل خپاره کړي يوۀ رپوټ کې ليکلي چې زرگونه پخواني طالب جنگيالي په تېرو دوو کلونو کې جرمني ته تللي دي.

شپيگل زیاتوي، دغه کسان هغه مهال جرمني ته ورغلي چې د ميليونونو کډوالو يوه څپه اروپا پر لور ورماته وه.

د دغې مجلې په وينا څارنوالانو لږ تر لږه په دې تړاو د ٧٠ کسانو په اړه پلټنې پيل کړي او ٦ تنه نيول شوي دي.

مطلب کې راغلي چې راتلونکې اوونۍ به ځينې کسان محکمې ته هم وړاندې شي.

دې شپيگل وايي مالومه نه ده چې رښتيا دغو ټولو مشکوکو کسانو به طالبانو سره اړيکي درلودل او که نه.