د بشر نويد کالم پښتونخوا:ای زما وطنه د لعلونو خزانې زما

Image caption وطن د ولس جامې دي، خو د بده مرغه ستا ټول اولسونه لوڅ ولاړ دي، ستا جامې هغه څو خاندانونو اچولې دي چې خاندانونه او د خاصې طبقې خلک چې زموږ لپاره مرده باد دي.

ای زما وطنه د لعلونو خزانې زما

ای زما وطنه

راځه چې نن تا ته ستا د لعلونو د خزانو، د تورو د نښانو نوې نوې معناوې وښیم چې تا ته معلومه شي، زه څه وم او اوس څه شوم.

ای زما وطنه،

موږ خو ستا د لعلونو خزانې فقط د غني خان په ترانه کې اورېدلي دي، د خزانو او د قارون په تعلق کې زموږ څه وو، او څه دي‎، موږ له مودو مودو راهیسې وايو:

چې بل قارون په خزانو ووينم

اخر انسان يم څنګه غلی شمه

خو موږ ټول عمر غلي پلي چپ وېرېدلي خاموش مظاهرين یو، د وجود د ننه بلا شور لرو، خو په شونډو مو نه راځي، ځکه چې شور هم جرم دی.

ای زما وطنه،

ستا لالونه د هرې جمعې په ورځ د هندوکش د زړه په درزا کې لکه د قيامت د زلزلې الوځي، د وينو لاوا په تارکولي سړکونو بهېږي، ستا د شهيد لال قيمت يو لک روپۍ او زخمي لال پنځوس زره کالدارې بيه لري، د سرکاري باوردي لالونو قيمت جنګ دی، پنځه لکه کالدارې د سرکاري شهيد بيه ده.

د ۲۰۱۲ د جون پر اتمه، د جمعې په ورځ چې په چارسده روډ د سرکاري اهلکارو په روان بس کې کومه بمي چاودنه وشوه، عین په دغه وخت د پښتونخوا په اسمبلۍ کې د نوي کال بودیجه کې شل فيصده په تنخا کې د زیاتوالي اعلان وشو، بايد چې په دغه موقع د پښتنو بې جنګه شهيدانو لپاره د شهات بيه هم جګه کړې وای ، ځکه چې دا ټول شهيدان د سياست او د حکومت په فهرست کې شمارل کېږي.

ټولو نوموړو ليډرانو د جمعې د ورځې تنخادارو شهيدانو سره د همدردۍ څرګندونه او د ترهګرۍ د واقعې غندنه کړې ده.

''مري به غريبان او ليډران به تبصرې کوي''

ای زما وطنه،

نه ستا په ننګ جنګ دی، نه ستا په سر جنګ دی، خو بيا هم ډک ډک کټونه کورونو ته راروان دى، نه جهاد دے نهٴ غزا ده، خو بيا هم په سرکاري حفاظتي تارونو کې محفوظ بادار خپلو اوږو تږو بې تنخا سپايانو بې روزګاره ولس ته وايي:

''زموږ جنګ به د دهشت ګردۍ خلاف جارى وى''

ای زما وطنه،

موږ څه په عجيبه مورچه کې ناست يو، وسله نه لرو، سر لښکر مو نه شته، د يوې بندې دروازې نه راته د ''عدم تشدد'' د فلسفې په غږ کې ويل کېږي چې ''موږ د جنګ خلاف د بابايي امن د فلسفې منونکي یو''.

بيا د عدم تشدد په نرمو مهينو شونډو دا سخته دړکه څه عجيبه ولګي.

''تر اخري ترهګر پورې به زموږ جنګ جاري وي.''

موږ حيران یو چې دا څنګه جنګ دی، لښکر شته، سر لښکر نه شته، په عدم تشدد هم يقين لرو، جنګ هم کوو، د شهادت مرتبې په يو لک کالدارو خرڅوو هم او د بهادرۍ تمغې هم اخلو.

دا موږ څنګه څنګه د بايللي جوارګرو په شان په تالا ميدان ولاړ يو، هېڅ نه پوهېږو چې:

لاليه تماشې له ځو که خپلې جنازې له

حالاتو ته چې داسې ستړي ستړي ور پشا يو

ای زما وطنه،

ته د پښتو په شاعرۍ کې څومره ښکلي یې، په ترانو کې څومره مست یې، په سندرو کې څومره نازولى یې، د شاعرانو د تصوراتي، خيالي دنيا يو خوب یې، خو چې د شاعرۍ د ريښمینې جامو نه دې لږ ساعت له رابهر کړ، او تا ته وګورو نو ټول نوکارې نوکارې یې، لکه پرهرونه دي چې خاندي.

اے زما وطنه!!

چې د ترانو د مستۍ نه دې رابېل کړو نو له کرايي د جنګه ستړی ولاړ يې، ستا ټوله مستي د يو څو شته منو په مدهوشه ګلاسونو کې ښکاري، ستا لوی غټ وجود په يو شيش محل کې فقط يو چورلک وي او بس.

ای زما وطنه،

ته چې د شاعر د سندرې نه رابهر شې نو بيا درته پخپله خپل شاعر هم حيران حيران ګوري چې دا څه يې

ای زما وطنه،

ستا په اړه پښتون قام پرست مشر محمود خان اڅکزي و‎يلي وو، چې په سورة رحمن کې خدای پاک څومره نعمتونه بيان کړي دي، زموږ په پښتون وطن کې هغه نعمتونه شته.

ای زما وطنه،

Image caption ستا په اړه پښتون قام پرست مشر محمود خان اڅکزي و‎يلي وو، چې په سورة رحمن کې خدای پاک څومره نعمتونه بيان کړي دي، زموږ په پښتون وطن کې هغه نعمتونه شته.

زهٴ تا ته اوتر اوتر ګورم، د سورة رحمن نعتمونه درکې لټوم، څه شو هغه ټول خواږه په تا کې..!؟

زما شاعرې سترګې لېونۍ دي، که هغه دعوې شاعرانه خيال وه، زه ستا تصوير نه شم جوړولی، که تا پردۍ جامې اچولې دي، زه دې نه شم پېژندلی.

ای زما وطنه،

ستا پښتانهٴ در په در کډه په سر دي، د دنيا د بدترين مهاجرت سره مخامخ دي، چې په خپله خاوره په تا کې دننه د يوې ضلعې نه بله ضلعه کې په کېمپونو کې پراته دي، د خیبر اېجنسۍ، باجوړ اېجنسۍ، وزيرستان خلک په کېمپونو کې ژوند کوي، مودې وشوې ستا قومي ترانه نه وايي او نه يې اوري.

ای زما وطنه،

وطن د ولس جامې دي، خو د بده مرغه ستا ټول اولسونه لوڅ ولاړ دي، ستا جامې هغه څو خاندانونو اچولې دي چې خاندانونه او د خاصې طبقې خلک چې زموږ لپاره مرده باد دي، څه تعجب دی چې کوم غاصبان، قږمي خاینان او د ولسونو لپاره مرده باد دي هغه ستا لپاره او ته د هغوى لپاره زنده باد یې.

ورته مطالب