نشه یي توکي ماغزه پڅوي

د خپريدو وخت: 10:52 گرینویچ - پنجشنبه 06 سپتمبر 2012 - 16 وږی 1391

نور لاسوندونه هم شته چې د دې ښکارندویي کوي چې په بنګ روږدي زلمي زده کړه کې تر نورو وروسته وي.

نيو زيلاند کې ترسره شوې یوې پراخې څېړنې موندلې چې په زلمیتوب کې د بنګ Cannabis څکول د مغزو وده ورو کوي او په پایله کې یې روږدي وګړي له مغزو پڅیږي.

دې څېړنې شاوخوا ۱۰۰۰ وګړي د ۲۰ کلونو په اوږدو کې بیا بیا آزمویلي دي او د بنګو د څکولو اوږد مهالی اغېز یې د دوی پر ذهني روغتیا باندې کچ کړی دی.

په دې څېړنه کې د برخوالو آی کیو IQ، یا د ذهني تکړه توب کچه، په ماشومتوب کې د بنجګ د څکولو د پیل نه د مخه، او بیا په وروستیو کلونو کې تر ۳۸ کلنۍ پورې آزمویل شوې ده، او جوته شوې ده چې بنګ د دوی پر مغزو باندې ژورې پڅوونکې اغېزې درلودلې دي.

دا هم برسېره شوې ده چې دا اغېزې بېرته رغېدونکې نه دي.

د موندنو له مخې هغه وګړي چې په زلمیتوب کې د بنګ څکول پیلوي، او ورپسې کلونو کې ادامه ورکوي، په منځنۍ توګه یې آی کیو ۸ نومرې رالوېږي، او د څکولو درول دا ذهني ځوړ بېرته نه سموي.

باور دا دی چې د زلمیتوب په کلونو کې کله چې عصبي انساج د ودې په حال کې وي نو د بنګ پرلپسې څکول پرې زهرجنه او ویجاړونکې اغېزه ښندي.

نور لاسوندونه هم شته چې د دې ښکارندویي کوي چې په بنګ روږدي زلمي زده کړه کې تر نورو وروسته وي.

د عصبي ناروغیو یو شمېر څانګپوهانو بیا دا هم ویلي چې په ځینو کسانو کې بنګ د سرمغزنتوب یا Schizophrenia په ګډون یو شمېر عصبي رنځونه هم زېږولی شي.

بنګ یو ډول کیمیاوي توکي دي چې له یو غرني بوټي نه ترلاسه کيږي، او د حشیشو او چرسو په ګډون د ډېرو نشه یي توکو په جوړولو کې هم کارېږي.

د بنګ کارول په ټوله نړۍ کې د روږدو او ناروږدو انسانانو تر منځ په پراخه کچه دود دی.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .