په دې وسیله کې د غږ اوريدل او ویډیو لیدنه شونې نه ده.

پېلوځی _ د لرغونې آریانا سکې

"لرغونې آریانا" د هغه کتاب نوم دی چې کاناډا مېشتي څېړونکي او ژباړن رحمت آریا ژباړلی او چاپ ته چمتو دی.

دا کتاب چې نهه برخې یې په لروبر وېبپاڼه کې خپرې شوې دي، د افغانستان اېکۍ یا سکې او لرغون توکي څېړي.

کتاب په ۱۸۴۱م کال کې په لندن کې د “اېچ اېچ وېلسن” لخوا چاپ شو.

د علامه حبیبي او کهزاد په ګډون ډېرو افغان تاریخ پوهانو دا کتاب د موخذ په توګه کاراوه او د افغانستان د شاوخوا دوه زره کاله تاریخ را نغاړي چې په سکو یې څه انځور شوي و.

په تېرو څو کلونو کې یو شمېر اېکې موندل شوي چې د هندوستان د ایکې پېژندنې له ډګر سره په تړاو د خورا ارزښت وړ دي.

د بودایانو، سفاریانو، ساسانیانو، اسلام او ترهغه وروسته مهال سکې په کتاب کې څېړل شوې دي.

د هغه مهال یانې لرغونې اریانا نقشه هم په یوه څپرکي کې انځور شوې ده.

د الکساندر مقدوني یا لوی الکساندر د لښکرو لارې په نښه شوې دي.

د افغانستان د یادګاري څلیو او لرغونو هديرو ته کتنه په کې شوې ده.

د کتاب په وروستي څپرکي کې د بېلا بېلو اېکیو بشپړه څېړنه شوې ده چې ښاغلي مېسن را ټولې کړې دي.

د بد ماشې چرګې په نوم د طنز کتاب له چاپه راووت

د کتاب لیکوال عبدالهاشم ناصري وایي له کوچنیوالي یې له طنز لیکلو سره مینه لرله.

د نوموړي په وینا په کتاب کې ډېر لیکل شوي طنزونه یې له ولسه راټول کړي دي.

کلتوري خبرونه

د آرت مجلې په لیکنه، په پاریس کې د “لوورې” موزیم ته په ۲۰۱۲م کال کې تر ټولو زیات سېلانیان ورغلي وو.

دا موزیم تېرکال شاوخوا لس میلیونو کسانو وکوت چې شمېر یې تر ۲۰۱۱م کال یو میلیون زیات وو.

په دویمه کچه د نېیویارک د هنرونو موزیم او په دریمه کچه د لندن درې موزیمونه راځي.

***

د هري پاټر په فلم کې لوبغاړی ریچرد ګرېفېټس د زړه تر عملیاتو وروسته د ۶۵ کلونو په عمر مړ شو.

نوموړي زیات کلونه په برتانوي سینمایي او تلوېزیوني فلم کې لوبېدلی و.

نوموړي د هري پاټر په فلم کې د "وېرنون ډورسلې" رول لوبولی و.

پښتو ته د انګلیسي او چینایی متلونو ژباړه

له انګلیسي او چینایي ژبې نه پښتو ته د ملتونو دوه کتابګوټي په کابل کې د بي بي سي خبریال، خوشحال تایب ژباړلي دي.

انګلیسي متلونه چې "اینه درواغ نه وایي" نومېږي، په ۶۷ مخونو کې او چینایي متلونه په ۵۶ مخونو کې چاپ شوي دي.

کتابونه د مومند خپروندی موسسې چاپ کړي او د اسلامي تمدن غزني د نومونې په ویاړ د ننګرهار فرهنګي ډالۍ ده.

د انګلیسي متلونو په یوه برخه کې راغلي: "ماشومانو ته ګورئ، غوږ مه ورته نیسئ".... او "اوږده ورځ به هم تېره شي."

په چینایي متلونو کې بیا لولو: "څوک چې په واک کې نه وي له پرزېدلو نه وېږېږي"، "کم عقل قاضي د خلکو د سوغاتونو له مخې پرېکړې کوي."

خوشحال تایب د لنډو کیسو په یوه ټولګه هم کار پیل کړی دی.