په دې وسیله کې د غږ اوريدل او ویډیو لیدنه شونې نه ده.

پېلوځی: د کارتوني فلمونو فیسټیوال

Image caption د فېسټیوال د جوړونکو په وینا موخه یې دا وه چې کارتوني فلمونه وهڅوي چې پېغامونه یې ټولنې ته ګټور پرېوځي.

دا اوونۍ (د جون پیل) په پلازمېنه کابل کې د خوځنده انځورونو(کارتوني فلمونو) لومړنی فېسټیوال د ګوېټې انستیتیوت په نوښت جوړ شو.

په فېسټیوال کې د شاوخوا ۱۸ فلم جوړوونکو ۲۶ فلمونه نندارې ته وړاندې شول او ځينې يې غوره وبلل شول.

د فېسټیوال د جوړونکو په وینا موخه یې دا وه چې کارتوني فلمونه وهڅوي چې پېغامونه یې ټولنې ته ګټور پرېوځي.

دوی وایي د "دا ډول فېسټیوالونو په جوړولو سره به هم د کارتوني فلمونو معیار لوړ شي او هم به د کارتون په برخه کې رغنده سیالیو ته لاره هواره شي."

د پېلوځي لنډ ادبي بنډار کې بحث لرو چې ګډونوال یې د ګویټې انستیتیوت مشر ابراهیم هوتک او فلمي ستوری ممنون مقصودي دي.

سل وتلي ناولونه

د برتانیې د "ګارډیېن" ورځپاڼې د نړۍ د سلو وتلو او مشهورو ناولونو نوملړ خپور کړ.

دغه نوملړ د نړۍ د تلپاتې مشهور اسپانوي لیکوال "میګېل دې سېروانتېس" د "دونکیخوت" په ناول پیلېږي او د روسي لیکوال "لیف تلستوی" د جګړې او سولې تر مشهوره ناوله دوام مومي.

په لست کې د افغان لیکوال مولانا جلال دین بلخي "مثنوي"، د ایراني لیکوال شیخ مشرف دین سعدي د "باغ" اثر، د هندي ـ برتانوي لیکوال سلمان رشدي د "نیمې شپې ماشومان" اثر او نور راځي.

خو له دغو سلو مشهورو نړیوالو اثارو یوازې یو یې پښتو ته ژباړل شوی دی.

هغه د لېف تلستوت د "جګړې او سولې" کتاب دی چې لیکوال او شاعر ډاکتر لطیف بهاند پښتو ته اړولی دی.

ولې نړیوال ادبي شهکارونه پښتو ته کم اړول کېږي؟ دا او نورې پوښتنې لیکوال، شاعر او څېړونکی نجیب منلی ځوابوي.

عبدالله محزون پوپلزي سلم تلين

په سویلې ولایت کندهار کې د ستر اديب او نازک خيال شاعر عبدالله محزون پوپلزي سلم تلين د یوه علمي سيمینار په ترڅ کې ولمانځل شو.

عبدالله محزون پوپلزى د کندهار د ډنډ ولسوالۍ په بلدي کلي کې په ۱۲۶۰ کال کې زېږېدلی او په ١٣٣٣ هجري کال کې ومړ.

نوموړى د یو شمېر نورو علمي اثارو تر څنګ په پښتو او فارسي ژبو دوه ديوانه هم لري چې يو يې چاپ او بل يې نه دی چاپ شوی. په دې اړه رپوټ لرو.

لا د غرونو هوسۍ څښي د نرګس اوښکې

لا د غرونو هوسۍ څښي د نرګس اوښکې، دا د ځوان شاعر ضيا الرحمان حسرت، لومړۍ شعري ټولګه ده چې يار خپرندويې ټولنې په ننګرهار کې چاپ کړې ده.

دا شعري ټولګه ببرک مياخېل لوستې او موږ ته يې پرې راپور چمتو کړى.

ډاکتر احمد سرمست ونازول شو

د افغانستان د ملي موسیقۍ د انستیتیوت بنسټ ايښودونکي ډاکتر احمد سرمست ته د "لندن د شاهي فیلارمونیکې" ټولنې د هغه د هنري فعالیتونو په بدل کې د دې ټولنې افتخاري غړیتوب ورکړ.

د نړۍ نورو څلورو هنرمندانو هم د ټولنې د جوړېدو د ۲۰۰مې کلیزې په ویاړ دا جایزه تر لاسه کړه.

په دغو مراسمو کې چې د لندن د "دورچېستر" په مشهور هوټل کې جوړ شوي وو، د برتانیا د فرهګني شورا د مشرې "ورنون الیس" تر وینا وروسته حاضرین ودرېدل او ښاغلی سرمست یې په اوږدو چکچکو بدر ګه کړ.

د لندن فیلارمونیکه ټولنه په ۱۸۱۳کال کې جوړه شوه او کلاسیکې موسیقۍ ته وده ورکوي.

ټولنه د نړۍ له لر او بره هغه کسان نازوي چې د موسیقۍ په برخه کې یې پاموړ خدمتونه کړي وي.

احمد سرمست په ۲۰۱۰کال کې د افغانستان د ښوونې وزارت په مرسته د موسیقي ملي انستیتیوت جوړ کړ.

۱۵۰ زده کوونکي لري او په پام کې ده چې شمېر یې ۳۰۰ تنو ته ورسېږي چې نیمایي به یې نجونې وي.

ډاکتر سرمست د "مسکو کنسرواتوریا" کې زده کړې کړي او بیا یې په استرالیا کې په افغان موسیقۍ کې دوکتورا واخیسته.

نوموړی په ۲۰۰۶م کال کې بېرته افغانستان ته ولاړ او هوډ یې وکړ چې افغان موسیقي د جګړې له اغېزو وژغوري.

ډاکتر سرمست ته د لندن د فیلارمونیکې ټولنې له خوا دا جایزه افغان موسیقي ته د خدمت په بدل کې ورکړل شوه.