د وردګو په سیداباد کې ځانمرګی برید شوی

د خپريدو وخت: 05:25 گرینویچ - شنبه‬ 01 سپتمبر 2012 - 11 وږی 1391

د وردګو له سيد اباد ولسوالۍ نه تازه را رسېدلي راپورونه وايي چې د موټر بم چاودنې او ځانمرګي بريد په تنېجه کې نهه تنه ملکي کسان او څلور تنه پولیس وژل شوي دي.

ددې ولايت د والي وياند شاهدالله شاهد بی بي سي ته وويل چې دا پيښه نن سهار وخته شاوخوا شپږ بجې شوې ده. هغه وویل چې لومړی د ولسوالۍ، امنيه قوماندانۍ او ګډې نظامي مرکز ترمنځ په سړک کې چاودنه شوې او وروسته ځانمرګي بريد کوونکي له چاودېدونکو توکيو ډک خپل مزدا موټر ته چاودنه ورکړې ده.

د نوموړي په وينا، په دې چاودنه کې نږدې ودانیو ته زیان اوښتی دی او لسګونه هغه کسان ټپیان دي، چې په نژدې بازار کې موجود وو.

د ناټو امنيت ساتنې نړيوالو ځواکونو يوه وياند وويل په پېښه کې د ايساف ځواکونو ته مرګژوبله نه ده اوښتې، خو د طالبانو يوه وياند چې د برېښنالیک له لارې يې د دغه بريد پړه منلې، ويلي لسګونو بهرنيو سرتېريو ته يې مرګژوبله اړولې ده.

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .