سوریه: برمته شوي ایرانیان خوشي شوي

د خپريدو وخت: 07:13 گرینویچ - پنجشنبه 10 جنوري 2013 - 21 مرغومی 1391

د ايرانيانو هغه ٤٩ کسيزه ډله چې څو مياشتې سوریه کې برمته شوې وه، سوري ياغيانو خوشې کړې ده. دغه ډله سوريه کې د ايران د سفير په ملتيا د پلازمېنې دمشق يوه هوټل ته رسېدلې ده.

دغه ايرانيان د هغو بنديانو په بدل کې خوشې شوي چې سوري چارواکو نيولي وو.

د برمته شويو کسانو په بدل کې د بنديانو د خوشي کولو موضوع د خبريالانو له نظره، لومړنى ګام دى چې په سوريه کې د جګړې له پيله راهیسې اخيستل کېږي.

د امريکا د بهرنيو چارو وزارت وياندې ويکټوريا نېولنډ ويلي، چې تبادلې وښوده چې د سوريې حکومت د خپلو وګړو پر ځای له ايران سره مرستې ته لومړيتوب ورکوي.

که څه هم د دغې موضوع په اړه د سوريې حکومت په رسمي توګه څه نه دي ويلي، خو د ترکيې يوې مرستندويه ټولنې چې د دغې موافقې په چاره کې يې مرسته کړې، ويلي سوري چارواکو له خپله اړخه څه باندې ۲۰۰۰ بنديان خوشي کړي دي.

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .