فرانسوي ځواکونو مالي کې له اورپکيو يو ښار نيولی

د خپريدو وخت: 21:39 گرینویچ - دوشنبه 21 جنوري 2013 - 02 سلواغه 1391

فرانسوي ځواکونو په مالي کې د ديابالي مرکزي ښارګوتۍ له اورپکو چې د دې مياشتې په لومړيو کې يې پرې ولکه کړې وه، بېرته نيولی دی.

د بي بي سي يو خبريال چې اوس په ديابالي کې دی سوځېدلي موټر چې د څرخي الوتکو په بمبارۍ کې ويجاړ شوي او د مرميو چرې چې ځمکه يې څېرلې، لېدلي دي.

دا له هغه راهيسې چې فرانسې په مالي کې پوځي مداخله کړې لومړی ځل دی چې ځواکونه يې د داسې عملياتو مشري کوي چې د ياغيانو تر ولکې لاندې ښار بېرته د حکومت تر کنټرول لاندې راولي.

راپورونه وايي ياغيان وروسته له يوې اوونۍ سختې جګړې او هوايي بمبارۍ له دغه ښار تښتېدلي دي.

د فرانسې حکومت وايي د پوځي مداخلې هدف يې دا وو چې د مالي ځواکونه په ټول هېواد خپل کنټرول بېرته ترلاسه کړي.

د دې مياشتې په لومړيو کې مالي ته له زرو زيات فرانسوي سرتېري واستول شول.

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .