ترکیه ۲۷۰ تورن محاکمه کوي

په پام کې ده چې نن په ترکیه کې یوه محکمه دهغو څه باندې دوه سوه او اویا تنو په اړه حکم وکړي چې په دغه هېواد کې د اسلام پاله حکومت د راپرزولو لپاره په دسیسه جوړلو تورن دي.

د پوځ پخوانی مشر الکر باشبوع او د پوځ یو شمیر نور افسران ، اکادیمیک کسان او ژورنالستان د تورونو کسانو په ډله کې شامل دي.

تورن کسان د ارجینکیون په نوم د یوې پټې ترهګرۍ ډلې د غړیتوب په ګډون په ناقانونه توګه د وسلو په لرلو او د ښاغلي اردوعان د ګوند عدالت او پرمختګ پر وړاندې د وسلوال پاڅون په هڅولو تورن دي.

الکر باشبوع چې د ۲۰۰۸ او ۲۰۱۰ کالونو ترمنځ یې د پوځ مشري کوله پر ده ټول لګیدلي تورونه رد کړي دي.

دا قضیه له سیکولرانو او پوځیانو سره په مخالفت کې د ښاغلي رجب طیب اردوعان لپاره یو لوی ازمایښت بلل کیږي.