بلوچستان کې یو امنیتي چارواکی وژل شوی او ۱۱ کسان ژوبل دي

د انځور حقوق .
Image caption ساجد مومند په پېښه کې وژل شوی دی.

د بلوچستان په چمن ښار کې د چاودنې له امله یو پولیس چارواکی وژل شوی او یوولس کسان ټپیان دي.

د بلوچستان د ایالتي حکومت ویاند انور کاکړ له بي بي سي سره په خبرو کې ویلي، چاودنه دچمن پر بوغره سړک شوې ده.

په سیمه کې خبریال محمد کاظم وايي، د ځای په ځای شویو باروتو له امله چاودنه هغه مهال وشوه چې د امنیتي چارواکي ساحد مومند موټر تېرېده.

ساجد مومند د قلعه عبدالله دپولیسو مشر و.

په پېښه کې د نوموړي د ساتونکو( پولیسو) په ګډون یوولس کسان ژوبل دي.

ځینې معلومات وايي، په پېښه کې اته ولسي وګړي ټپي شوي دي او ځايي روغتون ته لېږدول شوي دي.

په چمن کې روغتیايي چارواکي د اوو ټپیانو حالت نازک ښيي او وېرېږي چې له امله یې به یې د مړینې شمېر ډېر شي.

تراوسه د پېښې مسوولیت چا نه دی منلی.

له کندهار ولایت سره نښلېدلی پر ډیورنډ کرښه پروت چمن له مرکز کوټې ۱۲۰ کیلومتره لرې پروت دی.

له دې مخکې هم په چمن کې چاودنې شوې دي.