پاکستاني طالبانو د خالد مسید وژل کېدل منلي

خالد مسید د انځور حقوق EPA
Image caption د تحریک طالبان پاکستان ویاند ویلي، خالد مسید د افغانستان پولې ته څېرمه شمالي وزیرستان کې وژل شوی.

پاکستاني طالبانو منلې چې د تحریک طالبان پاکستان مرستیال خالد مسید، چې په خان سید سجنا هم مشهور و، شمالي وزیرستان کې د امریکا بنګنې الوتکې برید کې وژل شوی.

برید د تېرې پنجشنبې په ورځ شوی و.

د تحریک طالبان پاکستان ویاند ویلي، خالد مسید د افغانستان پولې ته څېرمه شمالي وزیرستان کې وژل شوی.

دوی وايي، اوس د ښاغلي مسید پرځای مفتي نور ولي مشر ټاکل شوی. مفتي نور ولي د بیت الله مسید نژدې ملګری و او وړاندې یې هم ددغه تحریک په مشرتابه کې ځینې کارونه کړي.

څلوېښت کلن مفتي نور ولي د طالبانو په تېر تاریخ یو کتاب هم لیکلی دی.

خالد مسید د ۲۰‍۱۴ کال اکتوبر میاشت کې امریکا د ترهګرو په لست کې شامل کړی و.

د پاکستاني طالبانو د تحریک ویاند محمد خراساني په یوه پیغام کې ویلي، خالد مسید د پاکستاني طالبانو د تحریک د مرستیال مشر سربېره د دغه تحریک د مسیدو د څانګې مشر هم و.

د پاکستاني طالبانو د مرستیال د وژل کېدو ادعاوې

وزیرستان: ''زړور'' قوماندان

دا لومړی ځل نه دی چې د طالبانو د تحریک پر مشرانو د امریکا بنګنې (بې پیلوټه) الوتکې بریدونه کوي. په ۲۰۰۷ کال، یې پر بیت الله مسید او بیا د هغه پر ځای ناستي حکیم الله مسید ورته بریدونه وکړل.

طالبان وايي، د خپل مشر د وینې غچ به د پاکستان له حکومته اخلي، ځکه چې په وینا یې د امریکا اصلي لاسپوڅی دی.

۳۸ کلن خان سید (خالد مسید) د جنوبي وزیرستان زنګړا سیمې اوسېدونکی و چې د طالبانو تحریک لپاره یې وژل کېدل یو لوی ګوزار ګڼل کېږي.

د انځور حقوق AFP

د پاکستاني طالبانو د پخواني مشر بیت الله مسید تر وژل کېدو وروسته، یاده ډله د مشرۍ پر سر د خپلمنځي لانجو له کبله په دوو برخو وویشل شوه.

د نوي امیر په توګه د ملا فضل الله تر ټاکل کېدو وروسته، خالد مسید د پاکستاني طالبانو له لویې او اصلي ډلې بېل شو او په سویلي وزیرستان کې د هغو طالبانو مشري په غاړه واخیسته چې په مسید قبیلې پورې تړلي وو.

خو څو میاشتې وړاندې دواړه ډلې یو ځل بیا سره پخلا یو ځای شوې. د همدې پخلاینې په پایله کې خالد مسید د مُلا فضل الله مشري ومنله او دی پخپله د پاکستاني طالبانو مرستیال وټاکل شو.

اړونده مطالب

ورته مطالب