کوټه کې د پښتنو د وژنې پر ضد کاربندي وشوه

د خپريدو وخت: 12:09 گرینویچ - جمعه 14 سپتمبر 2012 - 24 وږی 1391

د بلوچستان په مرکز کوټه کې د جمعې په ورځ(سپتمبر/ ١٤) هټۍ او نور کاروباري مرکزونه د احتجاج په دود تړلي وو.

دا کاربندي د پښتنو ملتپالو په غوښتنه تر هغه وروسته وشوه چې د زيارت په ورځ د بلوچستان له مرکز کوټې څخه ۲۵ کيلو متره جنوب ته وسله والو ١٠ پښتانه کارګران ووژل.

د پښتنوخوا ملي عوامي گوند يوه چارواکي عبدالروف د بي بي سي پښتو وېبپاڼې ته وويل چې وژل شوي پښتانه د سړک جوړولو په چارو بوخت وو چې څلورو وسله والو پرې بريد وکړ.

ښاغلي عبدالروف وويل بريدکوونکي په دوو موټر ساېلکلونو سپاره وو او د کارگرو له ډلې يې هغه بېل کړل چې پښتانه وو.

يو عيني شاهد هم وايي چې وسله والو د کارګرو تر پېژندګلوۍ وروسته هغوى په کتار کې ودرول او ډزې يې پرې وکړې.

پاکستاني خبري رسنۍ وايي چې بلوڅ بېلتون غوښتنکې ډلې 'یونایټد بلوچ لبېرېشن ارمي' د برید پړه پرغاړه اخستې ده.

د ډلې يوه وياند مريد بلوڅ خبرې رسنیو ته وويل چې حمله دوى کړې ده.

بلوچستان کې خلک وايي چې د پنجشنبې د ورځې پېښه د پښتنو پر ضد په دغه صوبه کې اولنۍ لويه پېښه ده چې د توکميز تاوترېخوالي اندېښنې راټوکولى شي.

د پښتونخوا عوامي گوند چارواکى عبدالروف وايي په تېرو وختونو کې هم بلوڅو بېلتون غوښتونکو خال خال پښتانۀ په نخښه کړي وو خو دا يې په يو ځايي د ډېرو کسانو د وژنې لويه پېښه ده.

د کوټې بازارونه او کاروباري مرکزونه تر ډېره خالي وو او د گاډو تگ و راتگ هم ډېر کم وو.

د پښتنو د وژنې پېښه په داسې يوه وخت کې وشوه چې د بلوچستان ايالتي حکومت د امنيت ښه کېدا دعوه کړې ده.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .