پېښور: د هوايي ډګر ټول بریدګر وژل شوي

د خپريدو وخت: 16:38 گرینویچ - 16 ډسمبر 2012 - 26 لیندۍ 1391

له پولیسو سره د مرستې په خاطر پوځ هم په دغو عملیاتو کې برخه واخیسته

په خيبر پښتونخوا کې پوليس چارواکي وايي د شنبې په ورځ پر باچا خان هوايي ډګر له برید یوه ورځ وروسته د امنیتي ځواکونو په عملیاتو کې پنځه وسله وال ووژل شول.

دوی وايي په بريد کې ټول لس تنه بريدگرو ونډه لرله چې پاتې پنځه يې د یکشنبې په ورځ (د ډیسمبر ۱۶مه) ووژل شول.

چارواکي وايي د شنبې په ماښام پر هوايي اډې له برید وروسته پنځه وسله وال له ښار نه بهر په یوه کور کې پټ شوي وو. پولیسو دغه کور معاصره کړ چې د وسله والو لخوا پرې ډزې پیل شوې.

له پولیسو سره د مرستې په خاطر پوځ هم په دغو عملیاتو کې برخه واخیسته او پر وسله والو يې ځوابي بریدونه پیل کړل.

د چارواکو په وینا د برید په دوهمه ورځ په ډزو کې پنځه وسله وال او یو پولیس وژل شوي دي. دغه راز دوه تنه پولیس ټپیان شوي چې روغتیايي حالت یې د اندېښنې وړ بلل شوی دی.

د خیبر پښتونخوا اطلاعاتو وزیر میان افتخار حسین وايي یو ترهګر ژوندی نیول شوی دی.

د پاکستان د ملي پوځ ویاند تورن جنرال عاصم بجوا وايي لومړنۍ پلټنې ښايي چې د یکشنبې په ورځ وژل شوي پنځه وسله وال ازبکان وو. هغه زیاته کړه چې په عملیاتو کې بل چاته زیان نه دی رسېدلی.

د شنبې په ورځ هم د وسله والو د برید په ځوابي ډزو کې پنځه تنه وسله وال ووژل شول.

چارواکي وايي د وسله والو په برید کې څلور ولسي وګړي ووژل شول او ۴۰ نور ټپیان دي.

د پېښور هوايي ډګر

د پېښور هوايي ډگر د ښار په داسې سيمه کې پروت دى چې شاوخوا يې د خلکو کورونه دي. يو لور يې قبايلو سيمو ته نژدې دى چې پخوا هم ترې د توغنديو گوزار شوى و.

د پېښور هوايي ډگر نړيوال دى او تر بريد وروسته ترې د الوتکو کښته پورته کېدل ځنډول شوي وو. خو دغه لړۍ د یکشنبې په ورځ بېرته پرانستل شوه.

دغه هوايي ډگر د پاکستان پوځ د خپلو پوځي الوتکو او چورلکو لپاره هم کاروي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .