سوابۍ کې د ګوزڼ ضد ټیم ساتونکی وژل شوی

د خپريدو وخت: 12:45 گرینویچ - سه شنبه 29 جنوري 2013 - 10 سلواغه 1391

د ننني برید پړه تر اوسه چا پرغاړه نه ده اخیستې، خو طالبان معمولاً د دغو بریدونو مسؤول ګڼل کېږي.

د خیبر پښتونخوا په سوابۍ کې د ګوزڼ ضد واکسین پر یوه ټیم برید شوی، چې له کبله یې د ټیم یو ساتونکی پولیس وژل شوی.

د سوابۍ یوه پوځي مشر سید محمد شاه بي بي سي ته ویلي، دغه ټیم پلی روان و، چې د موټر سایکل سپرو وسله والو تر برید لاندې راغی.

د وژل شوي ساتونکي نوم منصف علي ښ،دل شوی دی.

د روان ۲۰۱۳ کال د جنورۍ پر دویمه هم په سوابۍ کې د یوې ناحکومتي مؤسسې پر غړو برید وشو، چې د شپږ ښځینه کارکوونکو په ګډون اووه کسان په کې ووژل شول.

دا په روان کال کې د خیریه مؤسسې پر کارکوونکو دویم مرګونی برید دی.

په تېر دسمبر کې هم لږترلږه اته کسان هغه مهال په کراچۍ او شمال لوېديځ کې ووژل شول، چې اورپکو د پولیو کمپاین پر کارکوونکو برید وکړ.

جاسوسي

د ننني برید پړه تر اوسه چا پرغاړه نه ده اخیستې، خو طالبان معمولاً د دغو بریدونو مسؤول ګڼل کېږي.

اورپکو وړاندې ویلي وو، چې ګني د دوی په وینا د ګوزڼ ضد واکسین کارکوونکي د امریکا لپاره جاسوسي کوي.

د نایجریا او افغانستان په ګډون پاکستان کې هم د ګوزڼ بېلګې شته.

د سوابۍ یوه پولیس چارواکي اې ایف پي خبري اژانس ته ویلي، کله یې چې د واکسین ټیم په کالا کلي کې خپل کار پای ته ورساوه، نژدې کلي ته پر لاره پرې اورپکو برید وکړ.

دی وايي چې درېیو موټر سایکل سپرو پرې ډزې وکړې.

نوموړی زیاتوي، چې د ددو ډلو غړي نه دي ژوبل شوي، خو یو پولیس وژل شوی او برید کوونکي تښتېدلي دي.

دی زیاتوي، ښکاري چې د برید هدف پولیس و.

د روغتیا چارواکي وايي، په تېره دوشنبې په ګرده سوابۍ کې د واکسین ۵۳۸ کارکوونکي ګمارل شوي وو، چې له هرې ډلې سره یو ساتونکی پولیس مل و.

په سوابۍ کې مخکې هم د اورپکو بریدونه شوي وو، چې تر ډېره یې د ناحکومتي ارګانونو پر کارکوونکو او د ښوونې پر کارکوونکو کړي دي.

چارواکي وايي، تر دغه برید وروسته په سوابۍ کې د ټولو ناحکومتي انجوګانو فعالیتونه ځنډول شوي دي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .