پاکستاني طالبانو یو میاشتنی اوربند اعلان کړ

شاهد الله شاهد د انځور حقوق AFP
Image caption پاکستاني طالبانو پر حکومت غږ کړی چې اوربند ور سره وکړي

پاکستاني طالبانو د یوې میاشتې لپاره اوربند اعلان کړی چې د سوله ییزو خبرو ولاړ بهیر یو ځل بیا پیل شي.

د طالبانو ویاند شاهد الله شاهد په حکومت هم غږ وکړ چې د دوی پرېکړې ته مثبت ځواب ووایي.

هغه وویل چې د طالبانو مشرانو خپلو ټولو فعالینو ته لارښونه کړې چې بریدونه بند او پریکړې ته درناوی وکړي.

هغه په یوه وینا کې وویل چې د دیني عالمانو په غوښتنه یې د اسلام او هېواد په ګټه د یوې میاشتې لپاره د اوربند پرېکړه کړې ده.

نوموړي زیاته کړه، د حکومت لخوا د طالبانو وړاندیزونو ته مثبت ځواب او د عملي کولو ډاډ یې ورکړی چې د دوی مرکچیانو د سولې د خبرو لپاره حکومتي کمېټې ته رسولي وو.

شاهد الله شاهد ادعا وکړه چې طالبانو په ښه نیت حکومت سره د سولې خبرې شروع کړې وې.

هغه وویل، حکومت به د طالبانو په پرېکړه غور وکړي او د خبرو په لاره کې به پرمختګ وکړې.

طالبانو اوربند په داسې حال کې اعلان کړی چې امنیتي ځواکونو د وزیرستان په قبایلي سیمه کې په دې ورستیو کې عملیات کړي چې پکې یې جېټ الوتکو څخه هم کار اخیستل شوی و.

ورته مطالب