شمالي وزیرستان: دریو ورځو کې درېیم ډرون برید

Image caption دا په شوال سیمه کې په تېرو دریو ورځو کې د ډرون الوتکې درېیم برید دی

د پاکستان په قبایلي سیمه شمالي وزیرستان کې په تېرو دریو ورځو کې د بې پیلوټه الوتکې درېیم برید شوی چې په پایله کې یې شپږ سخت دریځي وژل شوي دي.

یوه ځایي حکومتي کاروکونکي ویلي چې دغه برید د سې شنبې ګهیځ د شمالي وزیرستان په شوال سیمه کې ترسره شوی.

دغه کس چې د نوم نه په ډاګه کولو غوښتنه یې لرله وویل چې په دغه برید کې د شوال سیمې په کنډغر کلي کې د سخت دریځو استوګڼ ځای په نښه شوی و.

دا په شوال سیمه کې په تېرو دریو ورځو کې د ډرون الوتکې درېیم برید دی.

تر دې وړاندې د دوشنبې په ماښام د افغانستان پولې ته نژدې منګروتئ په سیمه کې د خبیب خان په نوم یوه کس کور په نښه شوی و.

په دغه برید کې څلور سخت دریځي وژل شوي و.

د رپوټونو تر مخه په دغه کور کې ازبک سخت دریځو هم پناه اخېستې وه.

وژل شوي کسان هم د ازبکستان ښوول شوي خو کومې ازادې سرچینې لا د دغو ادعاوو پخلی نه دی کړی.

تر دې وړاندې د یکشنبې په ورځ هم په دغه سیمه کې د ډرون الوتکې برید شوی و چې پنځه کسه په کې وژل شوي و.

پاکستان کې له اوږد ځنډ وروسته د جون په ۱۱مه نېټه د امریکا د ډرون الوتکو بریدونه یو وار بیا پیل شول او روان کال تر دې دمه ۱۱ بریدونه شوي.

ورته مطالب