سوات کې د عوامي نشنل ګوند ځايي مشر وژل شوی

د چارواکو په وينا د خيبر پښتونخوا په سوات کې د عوامي نشنل ګوند يو سيمه ييز مشر د وسله والو کسانو له خوا په ډزو وژل شوی دی.

د پوليسو په وینا پېښه د مالم جبې په تلي ګرام کې رامنځ ته شوې ده.

د مالم جبې د پوليسو يوه کارکوونکي سيد علي شاه بي بي سي ته ويلي، چې "د عوامي نشل ګوند ځايي مشر جمشيد علي خان په سړک پلی روان و، دوو وسله والو پرې ډزې پيل کړې چې په نتيجه کې يې نوموړي د پېښې په ځای کې خپل ژوند له لاسه ورکړ".

سيد علي شاه وايي وژل شوی کس منګلور کې د کلي د ساتنې شورا مشر هم و.

د پاکستاني طالبانو وياند محمد خراساني د دغه بريد پړه پر غاړه اخيستې.

جمشيد علي خان تر دې وړاندې د مسلم ليګ ن غړی و، خو څو کاله وړاندې يې دغه ګوند پرېښود او له عوامي نشل ګوند سره يو ځای شو.

په تېره يوه اوونۍ کې په سوات کې دا د دې ډول دوهمه پېښه ده تر دې وړاندې دوه پوليس د وسله والو له خوا په ډزو ټپيان شوي وو.

وړاندې هم په سوات کې سياسي مشران، د امن ټولنو غړي او امنيتي کارکوونکي په نښه شوي وو،خو په تېرو دوو کلونو کې په دې ډول پېښو کې کموالی راغلی و.

ويل کېږي په تېرو اتو کلونو کې د سياسي ګوندونو مشرانو په ځانګړې توګه د عوامي نشنل ګوند غړي د اورپکو له خوا وژل شوي دي.

عوامي نشنل ګوند وايي، د طالبانو له خوا بريدونو کې يې له ۵۰۰ زيات غړي وژل شوي چې په هغو کې ځينې مشران هم شامل وو.

ورته مطالب