ویکي لیکس 'د سي آی اې سایبري جاسوسۍ ابزار' افشا کړل

سازمان سیا د انځور حقوق Getty Images

افشاګرې ویپاڼې ویکي لیکس زرګونه محرم اسناد خپاره کړي چې ادعا کوي د هغو سافټ ویرونو جزییات چې د امریکا د استخباراتو مرکزي اداره (سي آی اې) یې په پراخ ډول د کمپیوټري وسایلو هک کولو کې ترې کار اخلي.

د ویکي لیکس په ادعا دا "سایبري وسلې" په کمپیوټرونو او ځېرکو ټېلفونو او همداراز په کورني توکو لکه ځېرکو ټلوېزیونونو او ان د انټرنیټ موډمونو کې د سي آی اې د نفوذ لپاره کارول شوي دي.

د ویکي لیکس د راپور له مخې، ددغو نفوذي سافټ ویرونو ځینې خپله د سي آی اې لخوا جوړ شوي، خو ویل کېږي چې د بریتانیا د کورنیو اطلاعاتو ادارې (ام آی فایف) هم پر سامسنګ ټلوېزیونونو د برید لپاره د جاسوسۍ یوه سافټ ویر په جوړولو کې رول لرلی دی.

ادعا شوې چې سي آی اې د سامسنګ ځیرکو ټلویزیونو کې د نفوذ یوه لاره موندلې ده چې کولی شي ددې ټلویزیونو نژدې مکالمې واوري.

د سپینې ماڼۍ ویاند ویلي، "د ادعا شویو اطلاعاتي اسنادو د منځپانګې یا کره والي په اړه نظر نه څرګندوي."

د بریتانیا د کورنیو چارو وزارت ویاند هم ویلي چې نشي کولی په دې اړه نظر څرګند کړي.

+ ویکیلیکس: امریکا په عادي ډول د برازیلي مشرانو جاسوسي کوله

ویکي لیکس وایي، کومې سرچینې چې دا معلومات د خپرولو په موخه ددوی په واک کې ورکړی، ددې بحث راپورته کول یې غوښتل چې ایا د سي آی اې د هک کولو توان ددغې ادارې له واکونو ورتېر شوی دی؟

د بي بي سي د ټکنالوژۍ چارو خبریال مارک وارډ وایي، د سي آی اې د معلوماتو په ذخیره کې شته چې ډېره برخه یې لکه ځیرکو ټلویزیونونو ته ظاهرا بریالی نفوذ، د حیرانتیا خبره نه ده. تر دې وړاندې هم هکرانو په یوازې سر توانېدلي ورته کار وکړي، نو په دې توګه د یوې استخباراتي ادارې مامورین کولی شي له معمولي هکرانو یو ګام مخته وي.

د بي بي سي د ټکنالوژيکي چارو خبریال په وینا، دا احتمال شته چې سي آی اې د "ناوړه سافټ ویرونو" جوړولو باندې میلیاردونه ډالر لګولي وي.

مارک وارډ باور لري کوم څه چې د سي آی اې د هکرانو له توانایۍ ډېر اندېښمنوونکی دی، کمپیوټري سیسټمونو ته د نفوذ لارو په اړه د معلوماتو نه خپرېدل دي. دا خبره کېدای د سایبري مجرمانو لخوا په ناوړه توګه وکارول شي.

ویکي لیکس ویلي، خپاره شوي معلوماتو د هغو معلوماتو یوه برخه ده چې غواړي د سي آی اې سایبري فعالیتونو په اړه یې خپاره کړي.

+ ويکيليکس: نصير الدين حقاني د سعودي له سفير سره په اسلام اباد کې کتلي وو