فیسبوک هره میاشت ۲ میلیارده کاروونکي لري

فیسبوک د انځور حقوق Getty Images
Image caption د نړۍ د ټولو وګړو ۲۵ سلنه یې په میاشت کې یو ځل فیسبوک کاروي

د ټولنیزو اړیکو ویبپاڼې فیسبوک تازه شمېرې ښيي چې د روان کې په لومړیو درېیو میاشتو کې یې په ګټه وټه کې زیاتوالی راغلی او د کاروونکو شمېره یې هم دوه میلیاردو ته ور نږدې شوې ده.

د فیسبوک په خبره، هره میاشت یې د کاروونکو شمېره یو میلیارد او ۹۴۰ میلیونو کسانو ته رسي، چې له ډلې یې یو میلیارد او ۳۰۰ میلیونه کسان په ورځني ډول فیسبوک کاروي.

د امریکا د ټیکنالوجیکو سرچینو په خبره، فېسبوک د روان کال په لومړیو کې درېیو میاشتو کې یې ۳ میلیارد ډالره ګټه کړې ده.

فېسبوک ۳۰۰۰ نوي کسان ګوماري

له فېسبوک او ګوګل نه میلیونونه ډالر تروړل شوي

په دا وروستیو اونیو کې یاده ټولنیزه ویبپاڼه له دې امله تر سختو نیوکو لاندې ده چې ګواکۍ نفرت زېږوونکې ویناوې، د ماشومانو د جنسي ځورونې او ځان ژوبلونې بوږنوونکي انځورونه/ویډیوګانې پرې خپرېږي.

د تېرې چارشنبې په ورځ د فېسبوک بنسټګر مارک زوکربرګ، پر فیسبوک د خپرېدونکې محتوا د ارزونې لپاره د ۳۰۰۰ نویو کسانو د ګومارنې خبره کړې وه.

د نړۍ د ټولو وګړو ۲۵ سلنه یې په میاشت کې یو ځل فیسبوک کاروي، چې نوي کاروونکي یې ډېری د شمالي امریکا او اروپايي ټولنې له پولو بهر دي.

مارک زوکربرګ زیاته کړې، د فیسبوک کاروونکو زیاتوالي دا لاره هواره کړه چې دغه پاڼه د ټلوېزیون، سیاست او روغتیا په برخو کې نوره هم پراخه شي: "پر همدې بنسټ به زموږ راتلونکی تمرکز پر ټولنه جوړولو وي ... ډېر څه شته چې باید تر سره شي."

ورته مطالب