چلسي - مانچستر يونايتيد ته په ماتې ورکولو لومړى شو

چلسي
Image caption د چلسي دروگبا ، په منځ کې ، او کوول ، ښي لاسته ، گولونه وکړل

د انگلستان د فوتبال ليگ په لومړي کتار يا پريميرشېب کې له دې هيسته يوازې پنځه نورې لوبې پاتې دي .

د ٣٨ لوبو په دغه ليگ کې به همدا وروستۍ پنځه لوبې څرگندوي چې څوک د روان کال اتل دى .

د تير کال اتل مانچستر يونايتيد د شنبه د ورځې تر لوبې وړاندې لا دوه پواينټونه وړاندې و خو دويم نمبر چلسي يونايتيد ته ماتې ورکړه او ترې وړاندې شو .

چلسي د لوبې په لومړي هاف يا برخه کې د جو کوول له خوا گول وکړ او په لوبه کې برلاسى و .

په دويمه برخه کې لوبه تر ډيره مساوي روانه وه خو د چلسي دروگبا دويم گول وکړ او لوبه يې د مانچستر يونايتيد له واکه وايستله .

د دروگبا گول اف سايد ښکاريده خو لوبڅار څه ونه ويل .

مانچستر يونايتيد د لوبې په وروستيو لسو دقيقو کې يو گول وکړ خو د وېين رووني په نشتوالي کې يې نور څه ونه کړاى شواى .

په يوه بله لوبه کې په دريم مقام کې ناست ارسنل چې گڼ لوبغاړي يې ټپيان و د وولف لوبډلې ته يو صفر ماتې ورکړه .

د ارسنل له دې بري سره دوى دريم مقام لا پسې ټينگ کړ او له مانچستر يونايتيد څخه اوس ايله يو پواينټ شاته دي .

د څلورم مقم لپاره لوبه کې د لندن بل کلب تاتنهم له سندرلند څخه درې يو وبايلله .

ورته مطالب