کريکټ بورډ د تاج ملوک استعفى ومنله او نورې ټاکنې يې وکړې

ايمل شينوارى
Image caption ډاکټر ايمل شينوارى هيله من دى چې نوې ټاکنې به گټورې وي

دوه اوونۍ وړاندې چې تاج ملوک د بي بي سي پښتو وېبپاڼې ته د خپلې استعفى خبر ورکړ د کريکټ لوبې مينه والو لا هم هيله لرله چې کريکټ بورډ به دا پريکړه ونه مني .

اوس د بورډ لوړ پوړي چارواکي ډاکټر ايمل شينواري بي بي سي پښتو وېبپاڼې ته په ډاگه کړه چې د تاج ملوک استعفى منل شوې او پر ځاى به يې د اوس لپاره څوک نه گماري .

د دې دليل روښانه نه دى چې ولې د مرستيال روزونکي پر ځاى څوک نه ټاکل کيږي.

داسې گنگوسې دي چې ښايي کريکټ بورډ د مرستيال روزونکي پر ځاى د يوۀ مسلکي بيټينگ کوچ موقعتي يا دايمي گمارنه غوره بللې وي .

يو وړانديز دا دى چې د بهرنيو هيوادونو کوم مخکينى منډه جوړونکى په هغو اوونيو کې له افغان لوبډلې او روزونکي کبير خان سره واوسي چې مهمو سياليو ته چمتووالى کوي .

بل وړانديز دا دى چې دغه کس د مرستيال روزونکي په توگه دايمي له کبير خان سره واوسي .

که څه هم په دې باب نور سپيناوى د اوس لپاره ممکن نه و خو ډاکټر ايمل شينواري بي بي سي پښتو وېبپاڼې ته وويل چې په کريکټ بورډ کې ځينې نورې ټاکنې شوې دي .

نورې ټاکنې

د کريکټ بورډ دغه لوړ پوړي چارواکي وويل چې د ملي لوبډلې د لوبغاړو د ټاکنې يا سليکشن لپاره يې حميد شينوارى گمارلى دى .

د سليکشن کمېټه به گڼ کسيزه وي چې پکې به روزونکى کبير خان هم رول لري .

حميد شينوارى چې د ښاغلي ايمل شينواري په وينا د کريکټ لوبې پخوانى لوبغاړى دى، تر ډيره ناپېژندل شوې څيره ده .

دۀ د افغانستان د ملي لوبډلې له خوا او يا هم د ځوانانو او زلمو په لوبډلو کې لوبه نه ده کړې او په دې توگه د نړيوالو لوبو تجربه نه لري .

خو ډاکټر ايمل شينوارى وايي چې حميد شينوارى په خپل کار پوه او وړ کس دى او يو وخت يې په پېښور کې د کلب د کچې لوبه کړې ده .

ايمل شينواري دا هم وويل چې حميد شينواري پخوا د ١٩ کلنو د لوبډلې په انتخاب کې ونډه لرله .

د ١٩ کلنو لوبډله چې په نيوزيلنډ کې يې په نړيوالو اتلوليو کې برخه اخيستې وه د ډيرو له خوا کمزورې بلل شوې وه .

خو ډاکټر ايمل شينوارى وايي چې که څه هم د هغې لوبډلې په انتخاب کې د حميد شينواري لاس و خو وروسته نورو کسانو پکې د دۀ په وينا لاسوهنه کړې وه .

خپله حميد شينواري په دې برخه کې د خپل نوم د روښانولو لپاره رسنيو ته کله څه نه و ويلي .

د کريکټ بورډ په نورو ټاکنو کې نظيم جار د کورني کريکټ د پرمختيا کمېټې مشر ټاکل شوى دى .

ښاغلي جار که څه هم په کريکټ لوبې ليکنې کړي دي خو د دوى د لوبې او د لوبو په برخه کې يې د تجربې مساله روښانه نه ده .

ډاکټر ايمل شينواري بي بي سي پښتو ويبپاڼې ته وويل چې دوى د مالي چارو د مسووليت لپاره او دغه راز د کريکټ بورډ د ويبپاڼې د چلولو لپاره تخنيکي کس ته اړتيا لري او د مناسبو کسانو د گمارنې هوډ يې کړى دى .

ورته مطالب