هند او پاکستان د کرېکټ سیالۍ بیا پیل کړې

د خپريدو وخت: 12:37 گرینویچ - سه شنبه 25 ډسمبر 2012 - 05 مرغومی 1391

د پاکستان د کرېکټ لوبډله له پنځه کلن ځنډ وروسته هند ته د سیالیو لپاره ورځي

په پام کې ده چې له پنځو کلونو وروسته د پاکستان د کرېکټ لوبډله هندوستان ته لاړه شي او د هندوستان د کرېکټ له لوبډلې سره سیالۍ وکړي.

د پاکستان د کرېکټ لوبډله هند ته په دې سفر کې له هندي لوبډلې سره دوه د شلو شلو اورونو او درې یو ورځنۍ سیالۍ کوي.

د دواړو هېوادونو د کرېکټ چارواکو ترمنځ اړیکې په ۲۰۰۸ کال کې په ممبۍ کې له ترهګرو بریدونو وروسته چې شاخوا ۱۷۵ کسان په کې ووژل شول، خرابې شوې وې.

خو اوس چې د دواړو هېوادونو اړیکي د پخوا په پرتله ښې شوې دي د پاکستان د کرېکټ لوبډله هند ته د سیالیو لپاره ځي.

د دې سیالیو لومړنې هغه به په بنګلور کې د سختو امنیتي تدابیرو په ترڅ کې د سې شنبې په ماښام ترسره شي.

په دې سیالیو کې د هندوستان چپ لاسی بالر ذهیر خان برخه نه لري.

بل تکړه او مشهور لوبغاړي سچن ټنډولکر هم له یو ورځنیو لوبو د استعفا اعلان کړی.

امنیتي تدابیر

د هند او پاکستان ترمنځ د کرېکټ لومړنۍ سیالي په بنګلور کې ترسره کېږي.

په بنګلور کې د لوبغالي سخت امنیت نیول شوی دی.

د بمونو د خنثی کولو ډلې، پلټونکي سپي او ۵۰۰۰ پولیس دغلته د امنیت ساتلو په موخه ګومارل شوي دي.

په همدې حال کې ځینو ډلو ویلي چې د پاکستان او هند ترمنځ د ټولو لوبو پرمهال به په مظاهرو لاس پورې کړي.

خو امنیتي چارواکي وايي دا چې د دواړو هېوادونو لوړ پوړو چارواکو د کرېکټ د دغو سیالیو پرسر هوکړه کړې هیڅ یوې ادارې او ډلې ته به اجازه ورنه کړي چې د پاکستان او هند ترمنځ د کرېکټ لوبې ګډې وډې کړي.

په تېر جولای کې د پاکستان او هندوستان د بهرنیو چارو وزیرانو په ډیلي کې سره ولیدل او موافقه یې وکړه چې د دواړو هېوادونو ترمنځ دې سپورتي سیالۍ ډېرې شي.

د هند او پاکستان د کرېکټ لوبډلې په وروستي ځل په سریلنکا کې د شلو شلو اورونو د نړیوال جام په سیاليو کې مخامخ شوې وې.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .