بارسلونا وایې فبریګاس نه پلوري

Image caption سیسک فبریګاس په ۲۰۱۱ کال له ارسنال نه برسلونا فوټبال لوبډلې ته ولېږدېد

اسپانوي فوټبال کلب بارسلونا ویلي چې سیسک فبریګاس نه پلوري.

دفبریګاس رانیولو لپاره د انګلستان پریمیرلیګ لوبډلې مانچسټر یونایټډ د دوشنبې په ورځ د دویم ځل لپاره د ۳۰ میلیونو پونډو (۴۶ میلیون ډالرو) وړاندیز کړی و، خو د بارسلونا کلب یو وار بیا د یونایټډ دغه وړاندیز رد کړ.

د بارسلونا کلب له لوري په خپره شوې ویناپاڼه کې راغلي، چې د بارسلونا کلب اجرایوي مشرسانډرو روسیل د فبریګاس په پلورلو خوښ نه دی، او مانچسټر یونایټډ ته یې په ډاګه ویلي چې د فبریګاس د پلورلو اراده نه لري.

تر دې وړاندې تېره اونۍ د دغه ۲۶ کلن فوټبال لوبغاړي رانیولو لپاره ۲۵ میلیون پونډه (۳۸ میلیون ډالره) وړاندیز شوی و، خو اسپانوۍ لوبډلې یې وړاندیز رد کړی و.

د راپورونو پربنسټ، مانچسټر یونایټډ د فبریګاس ترڅنګ، د ریال مډرېډ تکړه لوبغاړي کرسټیانو رونالډو او د ټاټنهم لوبغاړي ګیرت بال پېرلو ته لېواله دی، خو لا تر دې دمه د هېڅ یو لوبغاړي په رانیولو کې نه دي بریالي شوي.

د بارسلونا نوی روزونکی

پر همدې مهال جراردو مارټینو د اسپانوي کلب بارسلونا نوی روزونکی ټاکل شوی دی.

نوموړی به د دوو کلونو لپاره د بارسلونا روزونکی وي.

د ارجنټاین ۵۰ کلن جراردو مارټینو وروسته له هغې پر دې دندې وګمارل شو، چې د بارسلونا پخوانی روزونکی ټیټو ویلانووا له خپلې دندې ګوښه شو.

نوموړی د سرطان په ناروغئ اخته دی او د درملنې په موخه یې خپله دنده پرې ایښې وه.

جراردو مارټینو پخوا د پاراګوای روزنکی هم پاتې شوی، نوموړی څلورم ارجنتاینی لوبغاړی دی چې د بارسلونا روزنکي په توګه به دنده ترسره کوي.

ورته مطالب