کرېکټ: د هند او نوي زيلاند لوبه سر په سر شوه

د انځور حقوق AFP
Image caption کوري انډرسن چې د نړۍ د تر ټولو چټکې سليزې ريکارډ یې په خپل نوم کړی، پنځه هندي لوبغاړي وسوځول

د نوي زیلاند او هند ترمنځ د پنځو يو ورځنيو کرېکټ لوبو د لړۍ دريمه لوبه ټای/ سر په سر پای ته ورسېده.

د لوبې پچه هند وګټله او نوي زيلاند ته يې لومړی د بېټنګ کولو بلنه ورکړه.

نوي زيلاند د ټولو لوبغاړو د سوځېدو پر سر ۳۱۴ منډې وکړې.

د دې په ځواب کې د هند لوبډلې په ټاکلو ۵۰ اوورونو کې د ۹ ويکټو په سر ۳۱۴ منډې وکړې.

يو مهال د هند د سر سر شپږ لوبغاړي يوازې د ۱۸۴ منډو په کولو سوځېدلي وو او داسې برېښېده چې نوی زيلاند به دغه لوبه په اسانۍ وګتي.

خو رويندر جدیجا او روی چندرن ایشون د نوي زیلاند د بالرانو پر وړاندې ودرېدل او لوبه يې کابو کړه.

د دغو دوو هندي بېټسمينانو ترمنځ د ۸۵ منډو شراکت وشو، چې د هند لپاره خورا قيمتي ثابت شو.

جديجا د ۶۶ منډو او ايشون د ۶۵ منډو تېزه لوبه وکړه.

د هند لوبډل مشر دهوني هم پنځوسيزه ووهله.

کوري انډرسن چې د نړۍ د تر ټولو چټکې سليزې ريکارډ یې په خپل نوم کړی، پنځه هندي لوبغاړي وسوځول.

تر دې وړاندې د نوي زيلاند د پيل لوبغاړو مارټن ګپتل او کين وليمسن په زړه پورې او چټکه لوبه وکړه.

ګپتل سليزه ووهله او د ۱۲ څلوريزو او دوو شپږيزو پر مټ يې ۱۱۱ منډې وکړې.

وليمسن په دغه لړۍ کې په دريم پرله پسې ځل پنځوسيزه ووهله او په ۶۵ منډو وسوځېد.

له دوی پرته د نوي زیلاند ويکټ ساتونکي رونچي او ټم ساودي هم تېزه لوبه وکړه او د هند لپاره د يوه سخت هدف په ټاکلو کې يې مهم رول ولوباوه.

د هند له لوري رويندر جديجه او محمد شامي دوه دوه لوبغاړي وسوځول.

د پنځو لوبو لړۍ کې نوی زيلاند دوه صفر مخکې دی او دريمه لوبه ټای/ سر په سر شوه.

هند اوس نه شي کولای دغه سريز وګټي که پاتې دوه لوبې وګټي نو ايله به وکړای شي د لوبو دغه لړۍ برابره کړي.

ورته مطالب