کرېکټ: هند انګلستان ته ستره ماته ورکړه

د انځور حقوق BBC World Service
Image caption هند د سورېش رېنا د شاندارې او چټکې سلیزې پر مټ انګلستان ته سخته ماته ورکړه.

نن (چارشنبه، اګست ۲۷ مه) د هند او انګلستان تر منځ د پنځو یو ورځنېو لوبو د سیریز په دوهمه هغه کې هند د سورېش رېنا د شانداره سلیزې پر مټ انګلستان ته پر ۱۳۳ منډو ستره ماته ورکړه.

دغه راز هند په سیریز کې د ۱-۰ برلاسی تر لاسه کړ.

د دوشنبې پر ورځ (د اګست ۲۵ مه) د سیریز لومړی میچ د باران له کبله تر سره نه شو.

د لوبې پچه انګلستان وګټله او ممکنه باران او بالرانو ته د پیچ مناسب حالت ته په پام سره یې لومړی د بالنګ پرېکړه وکړه.

د انګلستان دغه پرېکړه په پیل کې سمه ښکارېده ځکه په اته اورونو کې یې د ۱۸ منډو په بدل کې د هند د سر دوه لوبغاړي وسوځول.

خو تر دې وروسته د هند پاتې بیټسمینانو ښه لوبه نندارې ته وړاندې کړه.

روهیت شرما پر ۸۷ توپونو ۵۲ منډې او د هند کپتان اېم اېس دهوني پر ۵۱ توپونو ۵۲ منډې وکړې.

خو د هند په بیټنګ کې د سورېش رېنا لوبه ډېر د پام وړ وه. د یوازې پر ۷۵ توپونو د ۳ شپږیزو او ۱۲ څلوریزو پر مټ په زړه پورې سلیزه پوره کړه.

هند انګلستان ته په ۵۰ اورونو کې د ۳۰۵ منډو هدف وټاکه خو د لنډې مودې د باران له کبله د انګلستان هدف په ۴۷ اورونو کې ۲۹۵ منډې وټاکل شو.

د هند د دومره ډېرو منډو یو لامل د انګلستان ضعیفه بالنګ هم و. د دوی تېز بالر کریس جورډن په لسو اورونو کې ۷۳ منډې ورکړې او هیڅ وېکټه یې تر لاسه نه کړه.

هند په وروستیو ۱۳ اورونو کې د چټکې لوبې پر مټ ۱۳۳ منډې وکړې.

د انځور حقوق BBC World Service
Image caption د انګلستان بالرانو لوبه ډېره ضعیفه وه. کریس جورډن ۱۲ واېډونه وکړل.

د انګلستان له خوا کریس ووکس په لسو اورونو کې د ۵۲ منډو په بدل کې د هند ۴ لوبغاړي وسوځول.

په ۴۷ اورونو کې د ۲۹۵ منډو ستر هدف په ځواب کې د انګلستان ټول ټیم یوازې پر ۱۶۱ منډو غلی شو.

د انګلستان له لوري تر ټولو ډېرې منډې ۴۰ وې چې الیکس هېل د ۶۳ توپونو په وهلو وکړې.

که څه هم د انګلستان پیل ښه و او په لسو اورونو کې یې پر ۵۴ منډو هیڅ لوبغاړی نه و سوځېدلی خو تر دې وروسته یې بیټسمینانو نه لاره ورکه شوه او په ۳۱ منډو کې یې د سر پنځه لوبغاړي وسوځېدل.

په بالنګ کې د هند له خوا رویندرا جدېجه د انګلستان ۴ او محمد شمي او آر اشوین ۲، ۲ لوبغاړي وسوځول.

د پنځو یو ورځینو میچونو سیریز دریمه لوبه به د شنبې پر ورځ (اګست ۳۰ مه) په ناټینګم لوبغالي کې ترسره شي.

د یو ورځنیو میچونو نه وړاندې هند او انګلستان د پنځو ټیسټ (پنځه ورځنۍ لوبې) میچونو سیریز درلود چې انګلستان ۳-۱ وګاټه.

ورته مطالب