نړیوال جام کې هند او استرالیا د خپل ګروپ وروستۍ لوبې وګټلې

د انځور حقوق AFP
Image caption سورېش رېنا پر ۱۰۴ توپونو ۱۱۰ منډې وکړې.

۲۰۱۵ کال کرېکټ نړیوال جام سیالیو کې نن هند د خپل ګروپ وروستۍ لوبه له زمبابوې او استرالیا له سکاټلنډ وګټلې.

هند د زمبابوې د ۲۸۸ منډو هدف پر ۴ او استرالیا د سکاټلنډ د ۱۳۱ منډو هدف پر ۳ وېکټو لاسته راوړ.

زمبابوې ته هند لومړی د بیټنګ بلنه ورکړه او دوی د سر درې وېکټې یوازې پر ۳۳ منډو له لاسه ورکړې.

خو سین ویلیمز او برېنډن ټېلر بیټنګ کې ښه ملګرتیا وکړه او د لوبډلې منډې یې په ۲۹م اوور کې ۱۲۶ ته ورسولې.

د ویلیمز له سوځېدو وروسته پاتې لوبغاړو هم له ټېلر سره ملګرتیا وکړه او دوی په ګډه د زمبابوې له خوا هند ته د ۲۸۸ منډو هدف وټاکه.

ټېلر شانداره سلیزه ووهله او پر ۱۱۰ توپونو یې ۱۳۸ منډې وکړې چې ۵ شپږیزې او ۱۵ څلوریزې په کې شاملې وې.

زمبابوې وروستۍ څو وېکټې ژر ژر له لاسه ورکړې او همدا وه چې ټوله لوبډله یې په ۴۸،۵ اورونو کې وسوځېده.

Image caption میچل سټارک د ۱۴ منډو په بدل کې ۳ وېکټې واخیستې.

د هند له خوا بالنګ کې محمد شمي، اومیش یادف او موهیت شرما درې، درې وېکټې واخیستې.

په ځواب کې د هند د توپ وهونکو پیل هم دومره ښه نه و او پر ۹۲ منډو یې په ۲۳ اورونو کې ۴ وېکټې له لاسه ورکړې وې.

خو د لوبډلې کپتان یې ایم ایس دوني او تکړه توپ وهونکي سورېش رېنا پیاوړې ملګرتیا وکړه او تر پایه و نه سوځېدل.

رېنا ۱۱۰ او دوني ۸۵ منډې وکړې او دغه راز هند ټاکل شوی هدف په ۴۹م اوور کې پر ۴ وېکټو پوره کړ.

هند به د مارچ پر ۱۹مه په منځلوبه کې د بنګله دیش لوبډلې سره مخامخېږي.

بل خوا استرالیا خپل نسبتا ضعیف سیال سکاټلنډ ته په اسانۍ ماته ورکړه.

د استرالیا بالرانو د سکاټلنډ ټوله لوبډله په ۲۶م اوور کې یوازې پر ۱۳۰ منډو وسوځوله.

د دوی تېزو بالرانو میچل سټارک د ۱۴ منډو په بدل کې ۳ او پټ کمینز ۲ وېکټې واخیستې.

په ځواب کې د استرالیا توپوهونکو چټکه توپوهنه وکړه او که څه هم درې وېکټې یې له لاسه ورکړې خو هدف یې په ۱۶م اوور کې پوره کړ.

ټاکل شوې استرالیا د مارچ پر ۲۰مه منځلوبه ترسره کړي خو په منځلوبه کې یې سیاله لوبډله لا مالومه نه ده.

ورته مطالب