پاکستان له انګلستان نه د ټیسټ کرېکټ لړۍ وګټله

د انځور حقوق Getty
Image caption انګلستان په خپله لومړۍ پاړۍ کې ۳۰۶ منډې وکړې او په دويمه کې يې يوازې ۱۵۶ منډې وکړې

پاکستان په متحد عرب اماراتو کې د دريو پنځه ورځنيو کرېکټ لوبو لړۍ، دريمه لوبه په ۱۲۷ منډو وګټله.

پاکستان د ټیسټ لوبو دا لړۍ ۲-۰ وګټله.

انګلستان ته د دريمې ټيسټ لوبې د ګټلو لپاره د ۲۸۴ منډو هدف ورکړای شوی و، خو ويې نه شو کړای دغه هدف پوره کړي.

د لوبې په وروستۍ پاړۍ کې د پاکستان ورو توپ غورځوونکو خورا ښه لوبه نندارې ته وړاندې کړه او د انګلستان توپوهونکي يې پرېنښودل چې د خپل زړه لوبه وکړي.

انګلستان که څه هم د خپلې لومړۍ پاړۍ پيل تر يوه بريده ښه پيل کړ، خو د لومړۍ وېکټې له غورځېدو وروسته يې خپل مورال بايلود.

د انګلستان د منډو شمېر ايله ۵۹ وو چې شپږ لوبغاړي يې سوځېدلي وو.

د انګلستان لوبډلمشر الستر کوک يوازنی توپوهونکی و، چې د پاکستاني بالرانو پر وړاندې تر وروستيو شيبو په ميدان کې ولاړ و، خو ويې نه شو کړای لوبه راوګرځوي.

دويمه پاړۍ کې د پاکستان سوکه توپ اچوونکي ښه وځلېدل. ياسر شاه څلور، شعيب ملک درې او ذوالفقار بابر دوه مخالف لوبغاړي وسوځول.

پاکستان په خپله لومړۍ پاړۍ کې ۲۳۴ او په دويمه کې د محمد حفيظ د ۱۵۱ منډو پر مټ ۳۵۵ منډې وکړې.

انګلستان په خپله لومړۍ پاړۍ کې ۳۰۶ منډې وکړې او په دويمه کې يې يوازې ۱۵۶ منډې وکړې.

د انګلستان او پاکستان ترمنځ د دريو ټيسټ لوبو کې لومړنۍ لوبه بې پايلې وه او دويمه او دريمه يې پاکستان وګټلې.

ورته مطالب