بندیز پای ته ورسېد، د ترکیې دوې فوټبال لوبډلې پنځه کاله وروسته مخامخ کېږي

د انځور حقوق Eurosport
Image caption ګلاتاسارای لوبډله به پنځه کاله وروسته په دغه ډول یوه لوبه کې برخه واخلي

په ترکیې کې د ګلاتاسارای فوټبال لوبډلې مینه وال د خپلې خوښې وړ لوبډلې یوې کم سارې لوبې نندارې ته چمتووالی او خوښي کوي.

یاده لوبډله به د بییسیکتاس لوبډلې له سیالانو سره د اونۍ پای کې پنځه کاله وروسته په دغه ډول یوه لوبه کې برخه واخلي.

د دواړو لوبډلو تر منځ دغسې یوه لوبه د استانبول چارواکو له لوري د هغه بندیز له لرې کېدو وروسته شونې شوه، چې د مخالفو لوبډلو لوبغاليو کې یې د یوه بل پر لوبېدو لګولی و.

دغه بندیز ځکه لګول شوی و، چې د دغه ښار د فوټبال مینه والو تر منځ پېښ شوی تاوتریخوالی ډېری مهال لارو کوڅو ته رسېده.

۲۰۱۲ کال کې د فنر باغچه نومي فوټبال لوبډلې مینه والو د ګلاتاسارای لوبډلې پر وړاندې لیګ اتلولیو کې د خپلې خوښې وړ لوبډلې له ماتې وروسته له پولیسو سره اخ و ډب کې ښکېل شول او د لوبغالي میدان ته ووتل.

پولیسو هغه مهال د ګلاتاسارای لوبغاړي د خپلو ډالونو په مرسته د لوبې له ډګره وایستل.

وروسته لوبغاړي د کالیو بدلونو خونو ته لاړل او پولیسو د خلکو خپرولو لپاره اوړه شوي مرچ وشیندل.

وروسته قهریدلو نندارچیانو د لوبغالي شاوخوا لارو کوڅو کې خاورې خځلې وشېندلې او د دکانونو هندارې یې ماتې کړې. هغه لوبه د فنر باغچه لوبغالي سکوروساراکوګلو کې تر سره شوې وه.