د ستوني بندېدو درملنې نوښتګر هینري هیملیچ ومړ

د انځور حقوق AP
Image caption ډاکټر هیملیچ د ساه بندۍ ښکار کسانو درملنې لپاره ۱۹۷۴ کال کې یو ډول طبي تمرین ایجاد کړ

امریکایی نوښتګر روغتیا پال هینري هیملیچ د ۹۶ کلونو په عمر ومړ. ډاکټر هیملیچ د ستوني بندیدو ښکار کسانو درملنې لپاره ۱۹۷۴ کال کې یو ډول طبي تمرین ایجاد کړ.

د دغه ژغورونکي تخنیک له مخې د ناروغ پر نس فشار راوستل کېږي، چې تنفسي لاره یې پرانیستل شي.

نوموړی د شنبې په ورځ د متحدو ایالتونو په سینسیناټي ښار کې د زړه له حملې وروسته د رامنځته شویو روغتیايي ستونزو له کبله ومړ.

ډاکټر هیملیچ د مې میاشت کې پخپله پر یوې ناروغې مېرمنې د دغه روغتیايي تمرین ازموینه وکړه.

نوموړي د همدې تخنیک په مرسته د ۸۷ کلنې مېرمن له ستوني د غوښې یوه ایساره ټوټه چې هډوکی هم پکې و راوایسته. ډاکټر هیملیچ هغه مهال بي بي سي ته وویل:

'' تر پرونه پورې مې مې باور نه کاوه، چې زه به داسې وکولای شم. ''

د یاد تخنیک اختراع پر مهال نوموړی د سینسیناټي یوه روغتون کې د جراحۍ برخې مشر و. رسنیو ته په یوه لېږل شوې اعلامیه کې د هغه کورنۍ ویلي:

'' د نړۍ په لر او بر کې هغه د ډېرو لپاره یو اتل و. ''

اعلامیه کې ویل شوي:

'' له هغې ورځې، چې زموږ پلار په نیویارک کې د طب برخه کې دنده پیل کړه او بیا تر هغې، چې په سینسیناټي کې یې د سینې قفس د جراح په توګه دنده درلوده، هغه تل ژمن و، چې د خلکو ژوند ژغورلو لپاره نوې، اسانه طرحې رامنځته کړي او په څرګند ډول یې د خلکو د ژوند معیار لوړ کړ. ''

د ستوني بندیدو درملنه د ډاکټر هیلمیچ یوازینی نوښت نه و، بلکې نوموړي ۱۹۶۲ کال کې د سینې قفس پاکولو لپاره پیچکاري ته ورته یو کوچنی نل هم ایجاد کړ، چې د ویتنام جګړې پر مهال د ګڼو سرتېرو درملنه کې ګټور ثابت شو او اوس هم د سینې جراحي کونکو ناروغانو په درملنه کې کاروول کېږي.

ویل کېږي، د دغه تمرین له ایجاده راهیسې د امریکا د پخواني ولسمشر رونالډ ریګن په ګډون نژدې ۱۰۰ زره کسانو په متحدو ایالتونو کې د درملنې له دغه تمرینه ګټه اخیستې.