له مکسیکو سره پر پوله د دیوال لپاره د ټرمپ ځانګړی امر

د انځور حقوق .
Image caption ولسمشر ټرمپ ویلي مکسیکو به د نوي دیوال لګښت ورکړي

د امریکا متحدو ایالتونو ولسمشر ډونلډ ټرمپ له مکسیکو سره د امریکا پر سویلي پوله د دیوال رغوولو ځانګړی امر کړی دی. ښاغلي ټرمپ په یوه ټلویزیوني مرکه کې ویلي، چې مکسیکو به د دغه دیوال ټول لګښت پر غاړه واخلي.

نوموړي د خپل ټاکنیز کمپاین پر مهال د دغه ۲۰۰۰ میله اوږده دیوال رغولو ژمنه کړې وه. د چهارشنبې پر ورځ یو لړ مراسمو کې د دغه امر لاسلیک پر مهال نوموړي وویل:

''موږ له پیله د دغه دیوال رغولو خبره کړې وه. "

تمه کېږي، چې نوموړی به د روانې اونۍ اوږدو کې د پولو او کډوالو چارو اړوند ورته نور ځانګړي امرونه هم وکړي. ویل کېږي دغو کې به د ملي امنیتي تدبیرونو زیاتوالی، د کډوالو لاسرسی محدود کول او د منځني ختیځ او افریقا یو شمېر هغو هېوادونو اوسېدونکو ته د ویزا له ورکولو ډډه کول شامل دي، چې ډېری اوسېدونکي یې مسلمانان دي.

د ایران په اړه د ټرمپ او اسرائیلو لومړي وزیر ټیلېفوني خبرې

میلیونونو خلکو د ټرمپ ضد مظاهرې وکړې

د سپینې ماڼۍ بیانیه د ټرمپ پوځي پلانونه ډاګیزوي

له دې مخکې د چهارشنبې پر ګهیځ نوموړي له اي بي سي نیوز سره خبرو کې ویلي و، چې مسکیکو به د دیوال لګښت چې د ده له اټکل سره سم ۸ میلیاردو ډالرو ته رسېږي ورکړي:

" موږ به په دې اړه ډېر ژر خبرې پیل کړو او موږ ته به د مکسیکو له لوري دغه پېسې راکول کېږي. زه تاسې ته وایم دا به دوی ورکوي، په یوه بڼه، ښايي په یوه پیچلې بڼه. "

هغه زیاته کړه "او دا به د مکسیکو لپاره هم ډېره ښه وي. "