د موصل هوایي ډګر نیولو لپاره د عراقي ځواکونو عملیات پيل شول

نیروهای دولتی د انځور حقوق EPA
Image caption دولتي سرچینو ویلي چې عراقي ځواکونو په روانو عملیاتو کې پرمختګ کړی دی

د عراق امنیتي ځواکونو د موصل هوایي ډګر نیولو لپاره برید پيل کړی دی. دا برید د موصل ښار له لویدیځې څنډې نه د اسلامي دولت نومې ډلې د اورپکو ویستلو لپاره د عراقي ځواکونو د عملیاتو مهمه برخه ده.

د اسوشیېټډ پرس خبري اژانس د راپور له مخې؛ د غزلاني پوځې هډې ته نژدې هم د دواړو لورو ترمنځ درنه جګړه روانه ده.

داعش وړاندې دا سیمه ړنګه کړې وه، خو د دا ډول پراخې سیمې نیول د عراق پوځ سره مرسته کوي چې د موصل ښار پر ارتباطي لارو ولکه ولري.

+ د موصل جګړه: عراقي ځواکونه د اسلامي دولت وروستي مرکز پرلور

+ د موصل لوېدیځ نیولو عملیات بیا پیل شول

د موصل ښار ختیځه برخه تېره میاشت د عراق پوځ لاس ته ولوېد. بي بي سي خبریال چې له عراقي پولیسو سره ملګری دی ویلي؛ دوی د هوایي ډګر شاوخوا ته رسېدلي دي.

د پوځ یوه ویاند د عراق ټلویزیون ته ویلي؛ د غزلاني پوځي اډې او د موصل هوایي ډګر نیولو لپاره هم مهاله عملیات پيل شوي دي.

د انځور حقوق Getty Images
Image caption د عراق دولتي ځواکونو د ځمکنیو عملیاتو د ملاتړ لپاره موصل ته نژدې هوایي اډه جوړه کړې ده

د پوځ د ترهګرۍ ضد واحد ویاند ویلي؛ "تاییدو چې د موصل هوایي ډګر د سقوط په حال کې دی او ډېر به یې تر خپل کنټرول لاندې راولو."

هغه زیاته کړه؛ له ترهګرۍ سره د مبارزې واحدونه او د چټک غبرګون ځواکونه په ګډه دا عملیات مخته وړي.

هوایي ډګر او د غزلاني اډه د موصل سوېلي څنډې او د دجلې سیند لویدیځې خوا کې پرتې دي. د عراق زرګونه دولتي سرتېري او پوځیان له توپخانې او هوایي ملاتړ سره د موصل بېرته نیولو کې برخه لري.

ددې عملیاتو تر پيلېدو وړاندې د موصل ختیځې برخې اوسېدونکو ته خبرداری ورکړل شوی و. پوځي چارواکو ویلي؛ ددغې سیمې تنګې کوڅې لامل شوي چې د بېرته نیولو عملیات په سختۍ مخته لاړ شي.

د موصل لویدیځ ډېر نفوس لري او ویل کېږي چې ددغې سیمې په ځینو برخو کې خلک د داعش له وسلوالو ملاتړ کوي.

ملګرو ملتونو د هغو ولسي وګړو په اړه اندېښنه ښوولې چې په دغه سیمه کې ګېر پاتې دي. د راپورونو له مخې په دې سیمه کې شاوخوا ۵۶۰ زره ولسي وګړي ژوند کوي.

تردې مهال د موصل ښار او ورڅېرمه سیمو نژدې ۱۶۰ زره اوسېدونکي د جګړو له امله د خپلو کورونو پرېښودو ته اړ شوي دي. د ښار د ختیځې او لویدیځې برخې نښلوونکي ټول پلونه چې پر دجلې سیند جوړ شوي و، په هوایي بریدونو کې ویجاړ شوي.

داعش له ۲۰۱۴ کال راهیسې پر موصل کنټرول لري.

اړونده مطالب

ورته مطالب