د هند تر ولکې لاندې کشمیر: ودونو کې پر 'بې ځایه' لګښت بندیز

د انځور حقوق Getty Images
Image caption ایالتي حکومت وايي د خلکو له شکایتونو وروسته یې دغه بندیزونه لګولي دي

د هند تر ولکې لاندې کشمیر کې حکومت په ودونو کې پر لوړو لګښتونو بندیزونه لګولي دي.

د ناوې کورنۍ ته ویل شوي، چې باید له ۵۰۰ مېلمنو زیات و نه بولي او د زوم لپاره دغه شمېر ۴۰۰ کسان ټاکل شوی دی.

حکومت دغه راز ویلي '' د دې لپاره چې د خوړو ضایع کېدو مخنیوی وشي، باید د واده میلمستیا کې له اووه ډوله ډېر خواړه وړاندې نه شي

په ۱ ډالر واده

"لس شل کاله چې نور هم تېر شي، موږ واده نه شو کولی"

د پارلمان یوه غړي وړاندیز کړی، چې پارلمان ته د یوه قرارداد طرح وړاندې کړي او ورته بندیزونه په ټول هېواد کې ولګول شي.

کشمېر کې د ودونو لګښتونه ډېر دي او د واده خوړه کې، چې د دغې سیمې خلک یې وازوان بولي د غوښو او سابه ډول، ډول خواړه میلمنو ته ورکول کېږي.

حکومت وايي دغه امر به د اپریل میاشتې له لومړۍ نېټې پلي کېږي. دوی وايي دغه بندیزونه یې د خلکو له لوري د خوړو ضایع کېدو، بې ځایه اسراف او زوږ له شکایتونو وروسته لګولي دي.

حکومت دغه راز بندیز ۱۹۸۴ کال کې هم لګولی و، خو له احتجاجونو وروسته یې لغو کړ.

د هند نورو برخو کې هم ودونو کې خورا لوړ لګښتونه لیدل کېږي.

هندیان د ودونو پر میلمستیاوو، کالیو او ساعت تېريو لوړ لګښتونه کوي.

نومبر کې د کرناټک ایالت پخواني وزیر او سوداګر جي جناردنا ریډي د لور براهمني د واده مراسمو پنځه ورځې دوام وکړ.

د انځور حقوق Getty Images
Image caption د کشمیر ودونو کې میلمنو ته وړاندې کېدونکي خواړه ډېر مینه وال لري

د اټکل له مخې ویل کېږي، چې د دغه واده لګښت پنځه بیلیونو روپیو ته ورسېد، چې ۷۴ میلیونه ډالره کېږي.

د هغه واده په اړه داسې حال کې نیوکې وشوې، چې ډېری هندیان د نغدو پېسو نشتوالي له کړکیچ سره مخامخ وو.

د نورو لوړو لګښتونو تر څنګ د هغه واده میلمنو ته داسې بلنلیکونه استول شوي وو، چې سره زر په کې کارول شوي وو او ایل سي ډي سکرینونه یې درلودل.

اړونده مطالب

ورته مطالب