امریکا 'ښایي پر پولې ناقانونه اوښتونکو کورنیو غړي سره وویشي'

Boys climb border fence at Ciudad Juarez د انځور حقوق Getty Images

متحده ایالتونه پر دې غور کوي چې د هغو کورنیو ماشومان له خپلو مېندو پلرونو بېل کړي چې په ناقانونه توګه د مکسیکو له پولې دغه هېواد ته د اوښتو پرمهال نیول کېږي.

د امریکا د کورني امنیت وزیر جان کېلي سي ان ان ته ویلي، ددې کار هدف دا دی چې له مرکزي امریکا نه متحده ایالتونو ته د کورنیو له خطرونو د ډک سفر مخه ونیسي.

لسګونه زره والدین او د هغوی ماشومان چې ډېری یې د هندوراس او السلوادور له تاوتریخوالو تښتي، د امریکا له پولې د اوښتو پرمهال نیول شوي دي.

سرحدي امنیت د امریکا ولسمشر ډونلډ ټرمپ له عمده ټاکنیزو شعارونو و. او ژمنه یې کړې چې له مکسیکو سره پر پوله به دیوال جوړوي.

د ځینو امریکایي رسنیو د راپورونو له مخې، د نوې پالیسۍ له مخې به مېندې او پلرونه د قانوني بهیر په لړ کې یا هم بېرته خپل هېواد ته ستنولو پورې په توقیف کې وي او د ماشومانو ساتنه به یې تر هغه د روغتیا او بشري خدمتونو اداره کوي چې خپلو امریکایي خپلوانو ته وسپارل شي او یا یې د دولت مجوز سرپرست پالنه وکړي.

ښاغلي کېلي هم د دوشنبې په ورځ دا راپورونه تایید کړل. هغه وویل، متحده ایالتونو ته له مرکزي امریکا نه د مکسیکو له لارې د راتګ درلولو لپاره به هرڅه چې دده له وسې وشي ترسره کړي.

+ مکسیکو کې لسګونه زره کسانو د ډونلډ ټرمپ ضد لاریون کړی

+ له مکسیکو سره پر پوله د دیوال لپاره د ټرمپ ځانګړی امر

اړونده مطالب