ويډيو ښيي چې د پلاستيک ټوټې د خوړو ځنځير ته ننوځي

په دې وسیله کې د غږ اوريدل او ویډیو لیدنه شونې نه ده.
د چاپېریال ساتنې کارپوه رېچرډ کربي چې دا ویډیویي انځورونه جوړ کړي

یوه علمي څېړونکي له داسې شېبو ويډیویي انځورونه جوړ کړي چې ښيي د پلاستیک ډېرې وړې ټوټي د وړو سمندري ژویو له خوا ژوول کېږي.

دا د دې څرګندونه کوي چې څنګه په سمندر کې ژوي له پلاستیکي ټوټو اغېزمن کېږي او د خوراک برخه یې ګرځي.

نوي ویډیويي انځورونه یوازې یوه لاره ښيي چې څنګه پلاستیکي وړې ټوټې د سمندري ژوو بدن ته ننوځي او په پای کې د نړۍ د خوراکي توکو په ځنځير کې ورګډ شي.

پروسس شوې غوښې خوړل "ښایي ساه لنډي زیاته کړي"

د متیازو ازموینه مو د خوړل شویو خوړو ډول معلوموي

عمر اوږدوونکې مېوه او سبزي

هرکال ۱۵۰ میلیونه ټنه پلاستیک له چټل دانیو "ورک" کېږي. دا په داسې حال کې ده چې ملګرو ملتونو پلاستیکي ګندګۍ د چاپېریال لپاره یوه لویه ننګونه بللې ده.

د چاپېریال ساتنې کارپوه رېچرډ کربي چې دا ویډیویي انځورونه جوړ کړي وايي، هغه څه چې ده ته د پام او اندېښنې وړ وو دا دي چې څنګه د پلاستیک وړې ټوټې د سمندري ژوو بدن ته ننوځي؟

ډاکتر پني لیندک چې د چاپیریال ساتنې مسلې څېړي په دې اړه وایي:"اوس موږ ته جوته شوې چې هرکال په نړۍ کې ۳۰۰ میلیونه ټنه پلاستیک جوړېږي او لس سلنه یانې ۳۰ ټنه یې سمندرونو ته غورځول کېږي. "

د نوموړي په وينا "د دغو پلاستیکونو ۸۰ سلنه وړې او مایکروسکوبي ټوټې دي. د پلاستیک دا وړې ټوټې د سمندري ژویو لپاره یو ګواښ دی او د دوی هاضمې سیستم ته هم ور داخلېږي. "

د پوهانو په وینا د نړۍ خلک په دې پوهېږي چې څنګه لوی سمندري ژوي، لکه نهنګان، غټ کبان او نور پلاستیکي کڅوړې ژويي خو ښایي په دې پوه نه شي چې د پلاستیک هغه وړې ټوټې چې د دوی بدن ته داخلېږي د دوی د هاضمې سیستم ته زیان رسوي او بندوي یې.

د ډاکتر رېچرډ کربي په ګومان دا یوه غیر عادي چاره نه ده بلکه هغه بېلګې چې د بريتانیا له شاوخوا اوبو یې راټولې کړي دا په ګوته کوي چې دا یو عادي بهیر دی.

د پلاستیکي ګندګیو مسله د سمندري چاپېریال ساتنه کې یوه مهمه موضوع ده چې دولتي پروګرامونو کې شامله شوې ده.

ملګرو ملتونو اټکل کړی چې د سمندري اوبو په هر مربع میل کې ۴۶ زره وړې پلاستیکي ټوټې ګرځي. له همدې امله د ملګرو ملتونو د چاپېریال ساتنې ادارې د سمندرونو په پاکولو کار پیل کړی دی.

د ملګرو ملتونو د شمېرو له مخې۵۱ زره میلیارده وړې پلاستیکي ټوټې په سمندرونو کې لامبو وهي او بشر د هغو د کابو کولو موقع له لاسه ورکړې ده.

د طبعیي ژويو د یوه مرکز څېړونکي خبرداری ورکوي چې که حتی نن د پلاستیک تولید ودرېږي د کلونو لپاره به د پلاستیکي ټوټو ګندګي انسانانو ته سرخوږی جوړ کړي.

مخکنیو څېړنو هم په سمندرونو کې د پلاستیکي ټوټو د شته والي ګواښ کړی و.

ورته مطالب