لندن کې پر کډوال د بريد په تړاو شپږ تنه نيول شوي

د انځور حقوق Getty Images
Image caption په نيول شويو کسانو تور دی چې يو ۱۷ کلن ايرانی کردی او د ده دوه ملګري يې وهلي دي.

د لندن پوليسو د دغه ښار په جنوب کې پر کډوال او د ه پر دوو ملګرو د بريد په تړاو شپږ تنه نيولي دي.

پر دغو کسانو تور دی چې يو ۱۷ کلن ايرانی کردی او د ده دوه ملګري يې وهلي دي.

دغه زلمی له دوو نورو ملګرو سره کراېډون سیمه کې د بسونو تم ځای کې ولاړ وو، چې اتو ځوانانو پرې ګوزارونه وکړل.

لندن: یوه ډله کسانو پناه غوښتونکی زلمی سخت وهلی ټکولی

یخچال لرونکې لارۍ کې کډوال موندل شوي

ویل کېږي بریدګرو پر دغه زلمي له فزیکي برید مخکې له هغه پوښتنه کړې وه، چې د کوم هېواد اوسېدونکی دی.

پولیس وايي د هلک سر سخت ټپي شوی دی او وينه يې مغزو ته تللې ده. د دغه زلمي دوه نور ملګري هم برسېرن ټپيان شوي.

پولیس دغه موضوع د کرکې پېښې په توګه څېړي.

پوليس وايي تراوسه يې د دې پېښې په تړاو څلور نارينه او دوې ښځې نيولې دي.

برتيا کې د کارګر ګوند مشر جرمي کوربن د دې پېښې په اړه خواشيني څرګنده کړې او دغه کس ته يې د بشپړې روغتيا غوښتنه کړې.

عيني شاهدان وايي له ۲۰ تر ۳۰ تنه د شپې کلب مخې ته راغونډ شوي وو چې ځينې يې بريدګر او يو شمېر يې ليدو ته ولاړ وو.

اړونده مطالب

ورته مطالب