یمن کې د سعودي عربستان چورلکې غورځېدو پېښه کې ۱۲ پوځیان وژل شوي

د انځور حقوق Getty Images

په یمن کې په تېروتنه د سعودي عربستان یوه چورلکه په نښه شوې، چې ویل کېږي په کې ۱۲ پوځیان وژل شوي دي.

پېښه له پلازمېنې صنعا نه ختیځ لور ته مارب ایالت کې شوې.

د یمن دفاع وزارت خبري ویبپاڼې لیکلي، چې د هوايي دفاع نظام د چورلکې په پېژندنه کې تېروتنه کړې، چې له کبله یې له کښېناستو مخکې بلک هاک ډوله چورلکه له منځه تللې.

بل لور ته سعودي عربستان چارواکو ویلي څېړنه یې پیل کړې او په وینا یې د چورلکې غورځېدو د لاملونو په اړه به څه ویل له وخته مخکې وي.

یمن: د کډوالو پر بېړۍ هوايي برید کې ۳۱ کسان وژل شوي

م. م یمن کې د سختې لوږې خبرداری ورکړی

رپوټونو کې ویل شوي، چې وژل شویو پوځیانو کې افسران هم شامل دي.

یمن کې په تېروتنه د خپلو متحدینو په نښه کولو دا تر ټولو خونړۍ پېښه ده. ۲۰۱۵ کال کې مارب ایالت کې د سعودي عربستان پر یوې اډې د یاغیانو یوه توغندیز برید کې ۶۷ پوځیان وژل شوي وو، چې ډېری په کې د متحدو عربي اماراتو پوځیان وو.

د انځور حقوق AFP
Image caption له څه باندې دو کلونو راهیسې د ولسمشر هادي پلوي ځواکونه د حوثي یاغیانو پرضد جنګېږي

له دې مخکې تېره میاشت د حوثي ډلې وسله والو ادعا کړې وه، چې د سعودي عربستان یوه اپاچي ډوله چورلکه یې غورځولې ده.

د سعودي عربستان په مشرۍ پوځي اتحاد له تېرو دوو کلونو راهیسې د یمني حکومت په ملاتړ له حوثي یاغیانو سره په جګړه بوخت دي.

دغه دوه کلنه جګړه کې تر اوسه ۷۶۰۰ کسان وژل شوي دي او ۲۴ زره ټپیان شوي دي. ډېری دغه کسان د سعودي عربستان هوايي ځواک د بمباریو پایله کې وژل شوي دي.

اړونده مطالب

ورته مطالب