"په اچین کې بمبار شوې سیمه اوس هم د ټولو پر مخ تړلې"

ډان:

د انځور حقوق Getty Images
Image caption د تېرې جمعې په شپه امریکا پر دغه سیمه تر ټولو ستر نااټومي بم وغورځاوه.

پاکستانۍ ډان ورځپاڼې ليکلي چې امنيتي ځواکونه لا هم په اچين کې بمبار شوې سيمې ته خلک نه پرېږدي.

ورځپاڼې په جلال اباد کې د اچين له يوه اوسېدونکي سره خبرې کړې چې له بمبارۍ وړاندې له خپلې کورنۍ سره دغه ښار ته لېږدېدلى.

نوموړي ورځپاڼې ته ويلي "بمبار شوې سيمه د ټولو پر مخ تړلې او زه نه پوهېږم چې زما کور جوړ پاتې او که نه."

ورځپاڼې د افغان ځانگړو ځواکونو وينا هم راخيستې چې وايي ماينونو او په ځينو برخو کې د دوى پر وړاندې روان مقاومت سيمې ته د خلکو د پرېښودو چاره ځنډولې.

خو دوى دا نه وايي چې مقاومت د داعش د وسلوالو له لوري روان دى او که څنگه.

هندو:

هندۍ "هندو" ورځپاڼه وايي د هند د پلټونو ملي ادارې د ځينو افغان رسنيو هغه خبر نه دى کره کړى چې گواکې په اچين کې د امريکا له لوري کارول شوي تر ټولو لوى بم له امله ١٣ هندي وگړي هم وژل شوي.

ورځپاڼې د پلټنو ملي ادارې په وينا ليکلي چې په دې تړاو پلټنې روانې دي.

ورځپاڼه وايي، تېر کال د هند له کرېلا ايالت ٢١ سړي او ښځې د ايران له لارې افغانستان ته تللي وو چې له داعش سره يوځاى شي او په تېرو دوو مياشتو کې لږ تر لږه د حافظ الدين او مرشد محمد په نامه د دوو تنو د ادعا شوې وژنې په تړاو پلټنې روانې وې چې ويل کېدل د بې پيلوټه الوتکې په بريد کې وژل شوي وو.

نيويارک ټايمز:

د انځور حقوق Getty Images
Image caption د امریکا دفاع وزیر

نيويارک ټايمز سعودي عربستان ته د امريکا دفاع وزير جېم متېس د سفر اهميت ته کتنه کړې او وايي د سعودي حکومت او د ټرمپ ادارې ترمنځ اړيکي د بارک اوباما د واکمنۍ مهال په پرتله ښه شوي.

د ورځپاڼې په وينا ولسمشر اوباما د سعودي له نيوکو سره سره له ايران سره اټومي تړون لاسليک کړ خو ولسمشر ټرمپ د ايران پر وړاندې سخت دريځ خپل کړى، نو له دې امله سعودي د ولسمشر ټرمپ ادارې ښه هرکلى کړى.

ورځپاڼې د امريکايي چارواکو په وينا ليکلي چې له سعودي او عربي اماراتو سره به لا نورې استخباراتي او پوځي مرستې وشي.

گارډين:

برتانيا چاپ گارډين ورځپاڼه وايي، وسلوال پوليس روزل کېږي چې د دغه هېواد د پارلمان ودانۍ مخې ته شوي بريد ته د ورته بريدونو مخنيوى وکړي.

ورځپاڼه وايي پوليسو ته نوې لارښوونې شوې چې د گاډي پرمخکينۍ ښيښې يا هندارې ډزې وکړي، وړاندې دوى ته ويل شوي و پر روان گاډي دې ډزې نه کوي ځکه د موټر د بې کابو کېدو خطر شته.

د برتانيا پوليسو د رييسانو شورا مشر سايمن چېسترمن ورځپاڼې ته ويلي "که کوم گاډى په ځانگړې توگه که کومه لارۍ د وسلې په توگه بريد کې وکارېږي، نو درولو لپاره يې ډېر تکتيکونه نشته."

د انځور حقوق Getty Images
Image caption د برتانیا د پارلمان سره نږدې میاشت مخکې ترهګریز برید وشو.