ټرمپ د مکسیکو پر پوله له دېوال جوړولو تېر شو

د انځور حقوق Getty Images
Image caption ښاغلي ټرمپ په یوه ټویټ کې د دېوال پر جوړولو ټینګار کړی دی.

د امریکا ولسمشر ډونلډ ټرمپ چې له مکسیکو سره پر پوله دېوال جوړول یې له اصلي ټاکنیز شعاره ګڼل کېده، ویلي، دمګړۍ د دغه دېوال مالي لګښتونه د بودیجې له لایحې وباسي.

ښاغلي ټرمپ خپل ټاکنیز شعار تکرار کړی او ویلي دي، په نږدې راتلونکي کې به د دغه دېوال جوړولو ته د مالي سرچینو د پیدا کولو لپاره هڅه وکړي.

په ورته وخت کې د ښاغلي ټرمپ جګپوړې مشاورې "کلیان کانوی" ویلي، په کانګرس کې د دولت د مالي بودیجې د اسانوالي په موخه یې له مکسیکو سره پر پوله د دېوال جوړولو لګښتونه د امریکا د مالي بودیجې له طرحې ایستلي دي.

د برلین ښاروال: ټرمپ دې دېوال نه جوړوي

مکسیکو: د ټرمپ د دېوال لګښت به ورنه کړو

د امریکا او مکسیکو پر ګډه پوله د دېوال جوړول چې لګښت به یې په مکسیکو پسې ولیکل شي، د ډونلډ ټرمپ له اصلي ټاکنیزو شعارونو و.

دیموکراتانو، چې د امریکا په کنګره کې اقلیت دي، ګوتڅنډنه کړې وه که د دولت په روانه بودجه کې له مکسیکو سره پر پوله د دېوال جوړولو مالي لګښتونه ور زیات شوي و، نو هغه به وځنډوي.

له دې کار سره شونې ده دولت خپلې بودجې ته لاسرسی ونه لري او د چارو د ځنډ سبب شي.

پر دې ټولو سربېره ښاغلي ټرمپ په یوه ټویټ کې د دېوال پر جوړولو ټینګار کړی دی.

هغه د تېرې دوشنبې په ورځ د امریکا د محافظه کارو رسنیو له غړو سره په یوه خصوصي ناسته کې ویلي، د دېوال جوړولو هڅې به د روان کال تر راتلونکو میاشتو وځنډوي.

اغلې کانوې له فاکس نیوز سره په مرکه ویلي، اړینه نه ده چې د دیوال مالي سرچینې دې په یوه اونۍ کې برابر شي، خو د دغه دېوال جوړول زموږ لپاره لا هم یو لومړیتوب دی.

هغه مالي طرحه چې دمګړۍ په کنګره کې ده، ښاغلي ټرمپ پکې د مکسیکو دېوال جوړولو لپاره د یونیم میلیارد ډالرو د ځانګړي کولو غوښتنه کړې وه.

خو د کنګرې غړي دیموکراتان یې پر وړاندې په مخالفت کې ودرېدل.

د انځور حقوق AFP
Image caption د مکسیکو دېوال د لګښتونو په اړه د ښاغلي ټرمپ د ادارې اټکل دا دی چې ټولټال به ۱۲ میلیارده ډالره لګښت وغواړي.

په ورته وخت کې یو شمېر جمهوریپالو هم ویلي وو، د دېوال لګښتونه تر هغه ډېر لوړ دي چې د ډونلډ اداره یې اټکل کوي.

مکسیکو کې لسګونه زره کسانو د ډونلډ ټرمپ ضد لاریون کړی

د دوی په خبره، د ورته دېوال جوړول ۲۱ میلیارده او ۶۰۰ میلیونه ډالره لګښت غواړي.

د مکسیکو دېوال د لګښتونو په اړه د ښاغلي ټرمپ د ادارې اټکل دا دی چې ټولټال به ۱۲ میلیارده ډالره لګښت وغواړي.

ورته مطالب