فرانسه: د مکرون ټاکنیز کمپاین هک شوی

اېمانوېل مکرون د انځور حقوق Reuters
Image caption ټاکنیزې سیالۍ د پنجشبنې په ورځ پای ته ورسېدې

د فرانسې د ولسمشریزو ټاکنو د مخکښ نوماند "ایمانویل مکرون" د ټاکنیز کمپاین مرکز وايي، د یوه ستر انټرنېټي برید ښکار شوي دي.

یاد مرکز یو لړ داسې سندونه خپاره کړي چې په ډاګه کوي، هکرانو کره اسناد له ناکرو سره ګډ کړي چې د لارورکۍ سبب ګرځي.

دوی زیاته کړې، هکران غواړي د یکشنبې (مۍ ۷مه) د فرانسې د ولسمشرۍ د دویم پړاو په ټاکنو کې ښاغلی مکرون ضعیفه کړي.

د فرانسې ټاکنې؛ مکرون او لوپن لومړي پړاو ټاکنې وګټلې

لوپن ولسمشرۍ ته د ګوند مشري پرېږدي

منځپلوی "مکرون" به د فرانسې د ملي ګوند له ښۍ اړخې سختدریځې "مارین لوپن" سره د فرانسې پر ولسمشرۍ سیالي وکړي.

هک شوي سندونه د جمعې په ورځ پر داسې مهال چې د ټاکنیز کمپاین موده پای ته ورسېده، د (فایلونو په شریکوونکې) ویبپاڼه کې خپاره شول.

تر اوسه لا هک کوونکی لوری نه دی برملا شوی، خو د ښاغلي مکرون ټاکنیز غورځنګ "ان ماشه" ویلي، دا هر څه د سترو او همغږو عملیاتو پایله کې شوي دي.

د کمپاین مرکز بیا ویلي، هک شوي اسناد یې د مشروع فعالیتونو دي.

د "ټرینډ مایکرو" شرکت کارپوهانو تېره میاشت ویلي و، روسي هکرانو د ښاغلي مکرون د ټاکنیز کمپاین مرکز هک کړی دی، خو روسیې پکې لاس لرل رد کړل.

د یکشنبې په ورځ داسې انټرنټي شایعات خپاره شول چې "مکرون" په کارایب کې پټ بانکي حساب لري، خو ښاغلي مکرون دغه ادعا د (جعلي خبرونو) د لړۍ برخه وبلله او ویې ویل، هغه رسنۍ چې ورته خبرونه خپروي، ګټې یې له روسیې سره شریکې دي.

په دې وسیله کې د غږ اوريدل او ویډیو لیدنه شونې نه ده.
د فرانسې ټاکنې

اړونده مطالب

ورته مطالب