مصر کې د عیسویانو پر لېږدونکي بس ګاډي برید شوی

د انځور حقوق EPA
Image caption قبطیان د مصر نفوس لس سلنه دي

مصر کې وسله والو اورپکو پر هغه بس ګاډي برید کړی، چې قبطي عیسویان یې لېږدول. پېښه کې ۲۶ کسان وژل شوي او ۲۵ نور ټپیان دي. دغه کسان له پلازمېنې قاهرې نه ۲۲۰ کیلومتره لرې سویل کې مینا سیمه کې یوې کلیسا تر پر لاره وه، چې برید پرې وشو.

تر اوسه کومې ډلې نه دي ویلي، چې دغه برید دوی کړی دی، خو تېرو میاشتو کې داعش ډلې پر مصري قبطیانو بریدونه کړي وو او دا یې هم ویلي و، چې دغسې نور بریدونه به هم وکړي.

مصر کې پر کلیساوو له بریدونو وروسته بېړنی حالت اعلان شوی

'اسلامي دولت' مصر کې پر کلیساوو د بریدونو پړه منلې

شمالي سکندریه ښار کې د اپریل پر نهمه یوه کلیسا کې دوه ځانمرګي بریدونه شوي وو، چې ۴۶ کسان په کې وژل شوي وو. له هغه مخکې قاهره کې پر یوې کلیسا ځانمرګي برید کې ۲۹ کسان وژل شوي وو.

عیني شاهدانو چارواکو ته ویلي، چې پر بس لسو یا دوولسو کسانو برید وکړ، چې پوځي یونیفورم یې اغوستي وو او له پېښې وروسته وتښتېدل. سینا سیمه کې یوه عیسوي چارواکي ابراهام سمیر نیویارک ټایمز ته ویلي، چې وژل شویو کې ماشومان هم شامل دي.

د مینا والي حسام البداوي ویلي امنیتي ځواکونه سیمې ته رسېدلي او د بریدګرو لټون یې پیل کړی دی.

د انځور حقوق Reuters
Image caption ډېر قبطیان شکایت کوي، چې حکومت یې د خوندیتوب لپاره کافي هلې ځلې نه کوي

قبطیان د مصر ۹۰ میلیونه نفوس ۱۰ سلنه برخه ده. د تېرې میاشتې له بریدونو وروسته ولسمشر عبدالفتاح السیسي په ټول هېواد کې بېړنی حالت اعلان کړ.

نوموړي ژمنه کړې وه، چې له وس سره سم به له جهادیانو سره مبارزه کوي، چې ډېری یې په شمالي سینا سیمه کې دېره دي.

خو قاهره کې د بي بي سي خبریاله اورلا ګویرین وايي، ډېری قبطیان په دې اند دي، چې مصري چارواکي د دوی د خوندیتوب لپاره کافي هلې ځلې نه کوي.

اړونده مطالب

ورته مطالب