هېوادونه او شرکتونه له پاریس تړون د وتلو لپاره د امریکا پرېکړه غندي

د انځور حقوق PA
Image caption ټرمپ اقلیمي تړون د نورو هېوادونو په ګټه او د امریکا په تاوان بولي.

په نړۍ کې د امریکا د ولسمشر ډونلډ ټرمپ دا پرېکړه وغندل شوه چې د اقلیمي بدلون په هکله یې د ۲۰۱۵ کال له پاریس تړون د خپل هېواد وتل اعلان کړل.

د ملګرو ملتونو سرمنشي انټونیو ګوتېریش ویاند وايي، "دا ډېره خواشینوونکې ده". اروپايي ټولنې د امریکا دا پرېکړه "د نړۍ افسوسناکه ورځ" بللې ده.

خو د امریکا د جمهوريپال ګوند یوه مهم مشر ویلي چې د دغه هېواد د ډبرو سکرو صنعت د دې پرېکړې ملاتړ کړی دی.

د امریکا ولسمشر ویلي چې دا قانون امریکا ته "سزا" ور کوي او له امله یې په لکونو امریکایان بې کاره کېږي.

د امریکا پخواني ولسمشر بارک اوباما چې دا تړون یې منلی و، د ټرمپ پر دغه پرېکړه نیوکه کړې او ویلي یې دي. د ولسمشر ټرمپ اداره "راتلونکی ردوي".

د ډیزني اجرايي مشر رابرټ ایګور او د دې شرکت یو بل بنسټګر ایلن مسک د سپینې ماڼۍ له سلاکارۍ شورا استعفا کړې ده.

"اقلیمي بدلون پېښېږي، پاریس تړون پرېښودل امریکا او نړۍ لپاره ښه نه دي".

د کاناډا د چاپیریال وزیره کترین میکینا وايي، چې هېواد یې د ډونلډ ډرمپ پر دغه پرېکړه ډرر خواشینی دی.

فرانسې، جرمني او ایټالیا هم په ګډه بیان کې د دې تړون اړوند له امریکا سره هر ډول خبرې رد کړې دي.

د انځور حقوق Reuters
Image caption اقلیمي تړون له صنعتي هېوادونو د ډبرو سکرو نه کارول غواړي.

دا له هغه وروسته دي چې د امریکا ولسمشر ډونلډ ټرمپ وویل، پر ۲۰۱۵ کال د پاریس اقلیمي بدلون تړون ختموي.

په سپینه ماڼۍ کې د خبرو پر مهال هغه وویل چې واشنګټن له دې تړون وځي، ځکه د تړون شرطونه د امریکا پر اقتصاد بار اچوي.

د هغه په خبره، د واشنګټن لپاره داسې تړون دی چې نورو ته یې ګټه رسېږي، ځکه به دی له منصفانه شرطونو سره بیا د دې تړون کولو لپاره خبرې وکړي.

ډونلډ ټرمپ تېر کال د ټاکنیزو منډو ترړو پر مهال ویل چې له دې تړون به امریکا وباسي، ترڅو د تېلو او سکرو صنعت ته ګټه ورسېږي.