اردوګان: د قطر ګوښي کول غیر انساني او د اسلامي ارزښتونو خلاف دي

د انځور حقوق AFP
Image caption ښاغلي اردوګان پر سعودي عربستان مخامخ نیوکه و نه کړه.

د ترکیې ولسمشر رجب طیب اردوګان له قطر سره د یو شمېر عربي هېوادونو پرېکون غندلی دی.

ښاغلي اردوګان د قطر 'ګوښي کول غیر انساني او د اسلامي ارزښتونو خلاف ' بللي دي.

د جون پر پنځمه سعودي عربستان، مصر، بحرین، یمن او متحدو عربي اماراتو له قطر سره دیپلوماتیکي اړیکې پرې کړې.

دغو هېوادونو ویلي و، قطر د اخوان المسلمین په ګډون یو شمېر ترهرګرو سازمانونو سره مرسته کوي.

ښاغلي اردګان وویل د دغه بحران په حل کې له قطر سره مرستې ته چمتو دی، چې په وینا یې سعودي عربستان یې باید حل کړي.

ترکیې له مخکې نه دوحا ته د چرګانو غوښه، هګۍ او لبنیات استولي دي، چې د اونۍ تر پایه به د قطر بازارونو ته ورسېږي.

قطر: موږ ځکه ګوښه کېږو، چې پرمختګ مو چټک دی

"قطر کې حاکم نظام د القاعده خبرې کوي"

ټرمپ له قطر نه د "ترهګرۍ ملاتړ" ختمولو غوښتنه کړې

مراکش هم د دوشنبې پر ماسپښین ویلي، قطر ته به له خوړو ډکې الوتکې واستوي. دغه هېواد ویلي په دغه ټول بحران کې به بې پرې پاتې شي.

د سې شنبې پر ورځ انقره کې یوې پارلماني غونډې ته وینا کې ښاغلي اردګان ویلي هغه تګلارې، چې د قطر ګاونډیان یې پلي کوي، د منلو نه دي:

''قطر کې یوه ډېره جدي تېروتنه وشوه. له هره پلوه د یوه ملت منزوي کول غیر انساني او د اسلامي ارزښتونو خلاف دي. ''

دا داسې ده لکه د قطر لپاره چې د اعدام سزا پرېکړه شوې وي. نوموړي دغه راز پر قطر لګېدلي تورونه رد کړل او ویې ویل، چې دغه مملکت د اسلامي دولت نومې ډلې خلاف ډېر زړور ګامونه پورته کړي دي.

د انځور حقوق AFP
Image caption قطر هوايي کرښې الوتکو ته د ګاونډیو هېوادونو له هوايي حریمه د تېرېدو اجازه نه شته

یو شمېر عربي هېوادونو له قطر سره د تګ راتګ ټولې ځمکنۍ، هوايي او بحري لاري تړلې دي. سعودي عربستان او یو شمېر نورو هېوادونو پر قطر تور پورې کړی، چې د اخوان المسلمین، حماس او داعش مالي ملاتړ کوي.

ښاغلي اردوګان پر سعودي عربستان مخامخ نیوکه و نه کړه، خو ویلي یې دي:

'د خلیج مشر سیاستوال په توګه سعودي عربستان پاچا سلمان باید دغه مسله حل کړي او خپل مشرتوب وښيي. '

ورته مطالب