امریکا ته د روسیې خبرداری

An F/A-18E Super Hornet (similar to the one pictured) shot down the Syrian plane د انځور حقوق Getty Images
Image caption د امریکا په مشرۍ ټلواله وایي په رقه ولایت کې یې د سوریې سو- ۲۲ الوتکه ځکه وغورځوله چې د اسلامي دولت ضد او د امریکا ملاتړو وسلوالو یې بمونه وغورځول.

روسیې د امریکا په مشرۍ سوریه کې جنګېدونکې ټلوالې ته خبریداری ور کړ، چې الوتکو ته به یې د پوځي هدف په سترګه وګوري.

د مسکو دا خبرداری له هغه وروسته دی چې واشنګټن د یکشنبې په ورځ د سوریې د حکومت پوځي الوتکه وغورځوله.

د امریکا په مشرۍ ټلواله وایي په رقه ولایت کې یې د سوریې سو- ۲۲ الوتکه ځکه وغورځوله چې د اسلامي دولت ضد او د امریکا ملاتړو وسلوالو یې بمونه وغورځول.

روسیه- چې د سوریې د حکومت اصلي ملاتړې ده- وايي، د ورته پېښو د مخنیوي لپاره یې له امریکا سره اړیکي هم ځنډولي دي.

مسکو وايي، د دغو اړیکو له مخې پکار و، چې امریکا دوی خبری کړي وی، خو داسې نه دي شوي.

سپنه ماڼۍ وايي، په سوریه کې له ځان د دفاع حق لري.

خو د سپینې ماڼۍ ویاند سین سپایسر وايي، له روسیې سره د پرانیستو اړیکو ساتل ضروري دي.

دا پېښه په داسې مهال ده، چې د امریکا په مشرۍ ایتلاف او د دوی ملاتړي ځايي ملېشې له رقه د اسلامي دولت یا داعش د اېستلو هڅه کوي.

رقه له ۲۰۱۴ کال راهیسې په سوریه کې د اسلامي دولت د "خلافت" پلازمېنه بلل کېږي.

د انځور حقوق Reuters

د روسیې د ځواب څرنګوالی

د روسیې دفاع وزارت وايي، د فرات سیند لوېدیځ ته به هر ډول الوتکه په نښه کړي.

د نړیوال ایتلاف هر ډول الوتکه هغه که ډرون وي، که د فرات سیند لوېدیځ کې عملیات کوي، پر اسمان او ځمکه د روسیې د الوتکو ضد ځواکونه به د پوځي هدف په څېر چلند ور سره وکړي.

خو په بیان کې دا نه دي ویل شوي چې الوتکه به وولي.

رویټرز خبري اژانس د امریکا د پوځ د ویاند له خولې وايي، چې له دې پېښې وروسته یې د سوریې تشیالي یا فضايي حریم کې د الوتکو موقعیت بدل کړی.

د نوموړي په خبره، دا کار د امریکايي خدمتګارانو د خوندیتوب لپاره شوی دی..

سوریه کې د روسیې او امریکا همغږي

روسیه وايي، امریکا د اېس یو - ۲۲ الوتکې له غورځولو مخکې له دوی سره اړیکه نه ده نیولي، ځکه ور سره هغه اړیکې ځنډوي چې د ورته پېښو د مخنیوي لپاره هوکړه پر شوې وه.

خو د امریکا د ګډو ځواکونو لوی درستیز جنرل جیو ډنفورډ وايي، د دا ډول اړیکو د بیا پیلولو هڅه کوي.

دا لومړی ځل نه دی چې روسیه او امریکا دغه اړیکې ځنډوي.

مسکو تېر اپرېل هم له هغه وروسته دا تماسونه وځنډول چې امریکا د سوریې د حکومتي ځواکونو پر اډه کروز توغندی وغورځاوه.

دواړه لوري تېره میاشت سلا شول چې بیا دا تماسونه پیل کړی.

د سوریې حکومت سره د امریکا زیاتېدونکی ټکر


د سوریې حکومت د امریکا په لاس د خپلې الوتکې غورځول غندي او وايي، چې دا پېښه به ناوړه پایلې ولري.

که څه هم د سوریې شپږ کلنه جګړه کې دا لومړی ځل دی چې امریکا د بشار اسد رژیم الوتکه غورځوي، خو له څه مهال راهیسې د دواړو لورو ترمنځ د نېغ ټکر پېښې زیاتېږي.

د روانې میاشتې په لومړیو کې امریکا د سوریې د حکومت ملاتړې ډلې ډرون الوتکه وغورځوله.

له هغه مخکې او په مۍ میاشت کې یې د سوریې د حکومت پلوه ځواکونو پر کاروان بمبار وکړ.


د انځور حقوق Getty Images
Image caption د روسیې دفاع وزارت وايي، د فرات سیند لوېدیځ ته به هر ډول الوتکه په نښه کړي.

ورته مطالب