په وېلز کې د قران یو ښوونکی د جنسي ځورونې په تور په ۱۳ کال بند محکوم شو

Mohammed Haji Sadiq د انځور حقوق Wales News Service
Image caption محمد حاجي صادق پر ده باندې لګېدلي تورونه رد کړي دي.

د وېلز په کاردیف ښار کې د قران یو ۸۱ کلن ښوونکی د څو ماشومانو د جنسي ځورونې په تور په ۱۳ کال بند محکوم شو.

محمد حاجي صدیق ۳۰ کاله د کاردیف په جومات کې د قران تدریس کاوه.

ویل کېږي چې په تېرو څه باندې لسو کلونو کې یې ۱۵ ځلې ماشومان له جنسي پلوه ځورولي دي.

محکمې ویلي چې د قران دغه ښوونکي " له خپل موقفه ناوړه ګټه پورته کړې."

ښاغلي صدیق د ۵ تر ۱۱ کلنو ماشومو نجونو د جنسي ځورونې تورونه رد کړي دي.

رپوټونه وايي ده به هغه ماشومې نجونې ځورولې چې د قران د لوستلو پر مهال به یې تېروتنې کولې. ځینو قربانیانو ویلي چې له همدې امله یې د ده ټولګي کې له ګډونه ډار درلود.

یوې نجلۍ ویلي د ده د همدې جنسي ځورونې له امله یې غوښتل ځان ووژني.

دغو نجونو محکمه کې ویلي د هغو دودونو له امله چې دوی پکې رالوی شوي داسې احساس کاوه چې په دې اړه باید چا ته څه ونه وايي.

یوې قربانۍ ویلي:" د مذهب لپاره مې ډېره ګرانه ده، ان ناشونې ده چې د هغه څه په اړه چې شوي چا ته وغږېږې."

بلې قربانۍ ویلي د دوی په کلتور کې د هغه څه په اړه چې په جومات کې شوي له چا سره خبرې کول د منلو وړ نه دي. هغې ویل:" کله چې مې په دې اړه له خپلې مور سره خبرې وکړې، زما خبرې یې ومنلې او پولیسو ته یې خبر ورکړ".

اړونده مطالب