سعودي عربستان: د نښتو له کبله سلګونه کسان تښتېدلي

د انځور حقوق AFP/GETTY

رپوټونو کې ویل شوي د سعودي عربستان ختیځ کې د پولیسو او وسله والو تر منځ له نښتو وروسته سلګونه کسان له سیمې تښتېدلي دي.

پولیس له مې میاشتې راهیسې هڅه کوي د (العوامیه) سیمې زاړه کورونه وران کړي، ځکه په وینا په نریو کوڅو کې یې وسله وال شیعه ګان پټیږي.

خو فعالان بیا پر پولیسو تور پورې کوي، چې د سیمې اوسېدونکي له خپلو کورونو شړي. دا په دغه سیمه کې وروستی تاو تریخوالی دی، چې ډېر اوسېدونکي یې شیعه ګان دي.

سعودي عربستان له مسلمانو هېوادونو بښنه وغوښتله

سعودي عربستان: د ښځو شورا په غونډه کې ښځې نه لیدل کېږي

سعودي عربستان شیعه روحاني شیخ النمر اعدام کړی

د رویټرز خبري اژانس په رپوټ کې ویل شوي، چې وروستيو نښتو کې د دوو پولیس افسرانو په ګډون اووه کسان وژل شوي دي. ځايي فعالان وايي، پولیس د کورونو او ګاډو پر لور بې هدفه ډزې کوي، چې له کبله یې ودانیو ته زیان اوښتی دی او یا یې اور اخیستی.

د سعودي عربستان رسنیو په رپوټونو کې ویل شوي، چې یو شمېر کسانو له پولیسو د سیمې پرېښوولو اجازه غوښتې او بې ځایه شویو خلکو ته په یوه نژدې ښار کې د استوګنې اسانتیاوې برابرې شوې دي. د قطیف ښار شاوخوا کې مېشت شیعه ګان وايي، دوی د اکثریت سنیانو پرتله څنډې ته شوي او تبعیض ورسره کېږي.

د روان کال مې میاشت کې ملګرو ملتونو ادارې د سعودي عربستان هغه پرېکړه وغندله، چې د العوامیه سیمې مصوره سیمې ۴۰۰ کاله پخوانۍ ودانيو نړولو لپاره یې وکړه. دغه سیمې کې له درېیو تر څلورو زرو پورې کسان اوسي او د ملګرو ملتونو په باور تاریخي او کلتوري حیثیت ته یې زیان اوړي.

د انځور حقوق AFP
Image caption د مشهور شیعه دیني عالم شیخ نمر النمر له اعدام وروسته سیمه کې تاوتریخوالي زور واخیست

د کور جوړولو په تړاو د ملګرو ملتونو ځانګړې رپورټ ورکوونکې لیلانې فرح وايي، چارواکو د دې لپاره د سیمې برېښنا مزي پرې کړي، چې اوسېدونکي یې وتلو ته اړ شي.

ختیځ ایالت کې د حکومت مخالفینو د مېشت ځایونو نړلو په ۲۰۱۱ کال کې د عرب پسرلي په نامه له پاڅونونو وروسته پیل شول او بریدونو او احتجاجونو ۲۰۱۶ کال کې د مشهور شیعه دیني عالم شیخ نمر النمر له اعدام کېدو ورسته زور واخیست.

شیخ نمر چې د حکومت مخالفو احتجاج کونکو کلک پلوي و، په العوامیه سیمه کې اوسېد. سعودي حکومت القطیف سیمه کې د ترهګریزو بریدونو په جرم جولای میاشت کې څلور کسان په دار کړل.

په همدې میاشت کې العوامیه سیمه کې د بمي چاودنو له کبله دوه سعودي پولیس افسران ووژل شول. جون میاشت کې بیا یو بل پولیس افسر او دوه کسان د بمي چاودنو له کبله ووژل شول.

اړونده مطالب

ورته مطالب