بورکینا فاسو کې پر استانبول هوټل په برید کې ۱۸ کسان ووژل شول

د انځور حقوق Reuters
Image caption امنیتی ځواکونو سیمه کلابند کړې ده.

د بورکینا فاسو حکومت وايي، د دغه هېواد پلازمېنه اوګادوګو کې د "ترهګریز برید" له امله ۱۸ کسان وژل شوي او ۲۰ ژوبلېدلي دي.

عیني شاهدان وايي، درې وسلوالو پر هغو کسانو ډزې وکړې چې د "استانبول ملګری" په نوم د ترکي هوټل او مېلمستون مخ ته ناست وو.

په دې ډزو کې یو ترکی وګړی هم وژل شوی دی.

* بورکینا فاسو: پوځ پر واکمنۍ سره وېشلی

* نایجریا د افریقايي هېوادونو فوټبال اتل شو

برید د دوشنبې په شپه له ګڼې ګوڼې په ډګ سړک کوامي نکروما کې شوی دی.

د رپوټونو له مخې ځینې کسان هوټل کې ګیر وو.

پوځ د ښار منځ بند کړی او په دغه ښار کې د امریکا سفارت خپلو وګړو ته ویلي چې دې سیمې ته لاړ نه شي.

د تېر کال جنورۍ کې هم په همدې سیمه کې جهادیانو په چایخونه برید و کړ، چې پکې ۳۰ کسان وژل شوي وو.

د انځور حقوق Reuters
Image caption په برید کې ټپي شوې مېرمن.

د بي بي سي خبریال الیکس دووال سمیت وايي، داسې اندېښنه شته چې دا برید هم په القاعده پورې د تړلې یوې ډلې کار وي چې په ساحل کې فعالیت کوي.

دا برید د ۲۰۱۶ کال په جنورۍ کې په همدغه سړک په سپلنډیډ هوټل او کاپوچینو رستورانټ شوي برید ته ورته دی.

په هغه برید کې له ۱۷۰ ډېر کسان روغتونونو ته لېږدول شوي وو، چې ۳۰ پکې ووژل شول.

القاعده د هغه برید مسوولیت منلی و.

بورکینافاسو له داسې ساحل یا سمندرغاړې سره نښلېدلې چې د مالي برخه ده او په دغه هېواد کې توندلارې ډلې له ۲۰۱۲ کال راهیسې فعالې دي.

د انځور حقوق Getty Images
Image caption دا برید هم د تير کال پېښې ته ورته دی.