پاکستان: د امریکا تورونه په کلکه ردوو

د انځور حقوق Getty Images
Image caption پاکستان: د امریکا تورونه یو مخ رد کړل

د پاکستان ملي امنيت شورا افغانستان او د سویلي اسیا لپاره د ولسمشر ډونلډ ټرمپ په ستراتيژۍ کې پر پاکستان لگېدلي تورونه په کلکه رد کړي او وايي له پاکستانه د قربانۍ پسه جوړولو سره افغانستان کې هېڅکله سوله نه شي راتلای.

د لومړي وزیر شاهد خاقان عباسي په مشرۍ د ملي امنيت شورا غونډه شاوخوا پنځه ساعته روانه وه چې جګپوړو ملکي او پوځي چارواکو په کې ګډون کړی و.

د غونډې گډونوالو ويلي، د افغانستان شخړه د جګړې له لارې نه، بلکې د خبرو اترو له لارې هوارېدلی شي.

په ياده غونډه کې پاکستان یو ځل بیا تور پورې کړی، چې یو شمېر پاکستان ضد وسلوالې ډلې د افغانستان په ختیځو سیمو کې پټنځایونه لري او غوښتنه يې کړې، چې هلته باید پوځي عملیات ترسره شي..

د افغانستان لپاره د امریکا په نوې ستراتيژۍ کې پاکستان د یوه داسې هېواد په نامه یاد شوی، چې په کې اورپکي پتنځايونه لري او له دې ځایه په افغانستان کې بهرني او افغان ځواکونه په نښه کوي.

په دې ستراتيژۍ کې له پاکستانه غوښتل شوي چې په خپله خاوره کې دې د اورپکو ډلو پر ضد ګام پورته کړي.

"د پاکستان لومړی وزیر د امریکا له فشار د خلاصون لپاره سعودي عربستان ته لاړ"

پاکستان: د امریکا مرسته نه، باور یې غواړو

پاکستان: د ډونلډ ټرمپ افغان ستراتيژي ناهيلي کړو

د پاکستان د ملي امنیت شورا غونډې په پای کې ویل شوي پاکستان تل له امریکا او افغان دولت سره په ګډه کار کړى چې په افغانستان کې د خبرو له لارې ټيکاو رامنځته شي او په دې باوري دی، چې د افغانستان د شخړې حل یوازې د خبرو له لارې شونی دی.

اعلامیه زیاتوي، جګړې هلته يوازې ویجاړی کړی او په زرګونو کسان يې وژلي دي.

د انځور حقوق Getty Images
Image caption ولسمشر ټرمپ: پاکستان ترهگرو ته پټنځي ورکړي

د پاکستان ملي امنيت شورا د ولسمشر ټرمپ هغه خبره هم رد کړې چې ویلي و، له پاکستان سره يې د میلیاردونو ډالرو مرسته د ترهګرۍ ضد جګړې لپاره کړې.

یوې خپرې شوې خبر پاڼه کې راغلي، هغه مرسته نه وه، بلکې له ۲۰۰۱ عیسوي کال راهیسې يې امریکا ته د ترهګرۍ ضد جګړه کې د خپلې خاورې او هوايي حریم کارولو اجازه ورکړې وه او دغه پيسې ورته د دغې کړنې په بدل کې ورکړل شوې دي.

دا شورا وايي، پاکستان پر خپله خاوره د هر ډول وسلوالو ډلو ضد عمليات کړي او د خپلې خاورې ډېره برخه يې له دې وسلوالو پاکه کړې، چې په خبره يې په دغه هېواد کې د امنيت ښه کېدل يې ښه ثبوت دی.

د پاکستان د ملي امنيت شورا په غونډه کې د هند پر رول هم نیوکه شوې، چې د دوی په وینا په سیمه کې منفي رول لوبوي او تل يې تګلاره د پاکستان د ثبات ضد ده. خبرپاڼه زياتوي نو بیا هند څنگه کولاى شي چې په افغانستان او سیمه کې د سولې لپاره کار وکړي؟

ورته مطالب